15 de genièr de 2000

Cada jorn, ensajar d'escriure en lenga d'òc, qualques linhas per dire causas pichonas de la vida o imaginàrias, banalas, per rire, sorire o pensar, pel simple plaser de far foncionar la lenga e de balhar al mond l'enveja de legir e sustot de far la meteissa causa...
Uèi, 15 de genièr de l'an 2000,
pluèja sus la vila. Pluèja del marin (esparnha lo medecin ?). Cèl blanc. Ciutat, per la fenèstra, es grisa amb gròssas lagremas negras que davalan sus las parets milenàrias. Las torres sarrasinas, e son tet de teules redonds color de ròsa passida, contunhan pasmens de sorire, caras e uèlhs dobèrts virats cap al nòrd invesible.
Farà
freg sul mercat del dissabte e los parapluèjas se van trucar dins lo repotegadís de las femnas reguèrgas en causa de la pluèja. Mèfi las fuèlhas de pòrre que te fan lisar e espatarrar davant los uèlhs regaudits dels mercands de legums !
Anuèit, anirem escotar l'Eric Fraj a Badens ; serà benlèu lo sol rai de lum dins aquela jornada grisa. Benlèu, perque dison que, lo dissabte, lo solelh arriba totjorn a traucar. Sabètz perqué ? Per la simpla rason qu'aquel jorn la Santa Vèrge lava los lençòls del pichon Jèsus e li cal secar !

Glossari en clicant suls mots joslinhats
(Glossaire pour les mots soulignés)
Tornar al somari general ?