25 de genièr de 2000

Soi dins ma salièra, sol amb cent mila companhons e companhas, car, avèm de femnas, nosaus tanben, los grans de sal. Mai pichonas, mai finas, plan segur, mas tant saladas coma nautres e ne coneissi de pebradas...
Me demandatz d'ont veni ? Ma maire èra
lusenta, transparenta, podiá portar una nau mas portava pas una clau ; salvatja tanben ; jamai auriá pas tengut tampada dins vòstra man. Totjorn s'escapava : èra una maire liura. Mon paire ? A ! aquí sabi pas tròp respondre ; ma maire agèt pas temps de me ba dire que lo paire sortiguèt de darrièr una nivol, me sequèt e vaquí que ma maire aviá desaparegut e que mon paire, sol en plen mitan del cèl blau, me fasiá venir de mai en mai pichon : de gota d'aiga de mar, èri vengut gran de sal sus la platja de Grussan.
D'òmes amb minas de
palunièrs me venguèron culhir, coma una flor, un matin blau, e me portèron sus una granda piramida d'un blanc esbleugissent. Me daissèron far coneissença de mos companhons los mai pròches puèi, un còp de pala giganta nos desseparèt e me n'anèri de vagon e carton, puèi en cartonet, enfins dins una salièra de çò de Delcròs - aquel que se descarcassa per vos portar al vòstre ostal de la vila çò que vòstres grands avián dins l'òrt, a posita.
De companhs me soi faits dins la salièra que me contèron tanben son istòria. Abans apartenián a una societat occitana, puèi aquela foguèt crompada per d'americans que contunhan de vos far creire que la sal es occitana, de Camarga o de Grussan. Mas lèu serem totes
parièrs : artificials, que, la mar, pecaire ! tant val dire que serà talament " erikà-finazada " que n'auretz pas mai, de sal naturala. Coma ditz l'autre, lo Joan-Miquèl, lo del " duò de bohaires " (que l'ausiretz a Eissalabra lo 14 d'abril), serà la " Total-cagada " !
Una flaira fòrta me ven a las
narras. Qu'es aquò ? Es un perfum embriagant, nòl a paradís... Una man me pren, me pausa sus una lesca negra e olorosa... Ma companha m'aviá parlat d'aquò : es una lesca de trufa negra. Vau morir al paradís. I a sòrts pièjas ! La man pren la lesca, un trauc roge se dubrís, de dents blancas m'espotisson... Adi...

Glossari en clicant suls mots joslinhats
(Glossaire pour les mots soulignés)
Tornar al somari general ?