27 de genièr de 2000

Un solelh de fuòc te pesa sus las espatlas. La set canina te seca l'endedins. E tu contunhas de córrer que te dison esportiu. La reputacion al cap del camin. Per dire de contunhar d'avançar, te fas un sòmi de lençòls blancs e t'enrotlas dins sa frescor. Anem, as fait cent mètres de mai. Avança, fenhant ! Baissa lo cap, auràs l'aire d'un correire ! Onèstament, aquò te fa susar de córrer, al pròpre coma al figurat. De fait, la susor raja sus ta cara, ton còs tot entièr. Tos pes te pòdon pas mai portar, escalfats que son per las cauçaduras de corsa que ne vantan la ventilacion, la soplesa, lo ressòrt. Ja ! E la vendeira que t'aviá jurat qu'atal avançariás mai aviat ! " C'est c'la ! ". Aquela calor arriba a te far pensar en francés, es fòrta aquela ! Tot pintorlat de roge, arribas pròche lo teu ostal. Una nivol amaga lo solelh ; t'èras pas solament avisat que lo temps aviá virat a l'auratge. Aqueste còp, segur, la solelhada es acabada. Contunhas de fugir coma se qualque gos te perseguissiá ; sentisses ja la calor de son buf, sos caissals son a te mossegar... Enfins, la pòrta se dobrís e te pòdes amagar, la vergonha al còr ; degun t'aurà pas vist, escrotlat al ras dels escalièrs. Anem, la docha, un veirat d'aiga e deman tornaràs començar. A ! qual dirà la solitud del correire solet que corrís contra el, contra son fasti, per gardar la linha...

Glossari en clicant suls mots joslinhats
(Glossaire pour les mots soulignés)
Tornar al somari general ?