29 de genièr de 2000

A Montsegur, las danças se seguisson. Los fuòcs tanben. Ara, son fuòcs de jòia, los de sant Joan e vòlon dire lo retorn del lum, lo revelh de la natura, la glòria de l'estiu. Se sovenon pas mai del primièr fuòc, dels crits e dels cants dels catars que se getèron sul lenhièr per pèrdre pas sa fe, son espèr d'un mond melhor, de paratge e de lum. Cantavan " Lo boièr " que li mostrava lo camin del cèl e de las cabras, de la resureccion... Ara, fan grasilhar salsissas, anhèls...
Ara, lo país es vengut "país catar" !
Valent a dire que tot çò que los catars (los perfièits almens) manjavan pas es "catar" : lo pòrc, lo caçolet, lo vin... Vegèri tanben un restaurant que metiá sus sa carta la " grasilhada de costèlas d'anhèl cataras " ! Las quitas "pompas funèbras" se dison "cataras" (cal dire que te prepausan la "cremacion" ! Es pas de publicitat messorguièra).
Mas, se t'avisas de dire ton estonament davant aquelas messorgas, te dison que lo mot "catar" es "portaire", que "occitan" auriá una conotacion politica... Lo
fotre te pren e te'n vas manjar al MacDò que el, encara o es pas devengut ! Emai se'n manca.
Non,
badini, me'n vau manjar de trufas vestidas en mièg-dòl : una lesca de patana bolhida amb una lesqueta de trufa dessús, un rajòl d'òli d'oliva de Bisan de Menerbés, una presa de sal de Grussan, un chic de pebre... e montas al cèl.

Glossari en clicant suls mots joslinhats
(Glossaire pour les mots soulignés)
Tornar al somari general ?