31 de genièr de 2000

E perqué las femnas poirián pas parlar de cosina ? Es reservat als òmes ? Aquela novèla fòrma de machisme, nascuda del "paritarisme" ("parasitisme" ?) - que vòl pas que las femnas parlèsson de "causas de femnas" - me gèina fòrt perque aimi evocar la qualitat de la noiridura, lo vin que l'acompanha, los veires que cal utilizar (grand per l'aiga, mejan pel vin, fin e naut pel vin blanc, calibrat per plan analizar las redoléncias del nas de cada vin...). Un libre de cosina "seriós" es totjorn escrit per un òme. A las femnas las brodariás, la cosina "coma del temps de la mameta". La creacion es encara pels òmes.
Veni d'agachar un film que se ditz " La Passion des épices ". Encantaire ! La magia, la
brueissariá dels ingredients, mesclats amb amor (las catlas farcidas amb petals de ròsas) transfòrman los manjaires en èstres de plaser. Las lagremas de la maire que pèla cebas se càmbian en granetas de sal quand la neneta nais e van alimentar la familha pel temps d'un an. Pelarai pas mai las cebas coma abans...

En defòra d'aquò, una sentor de prima se passeja per carrièra ; lo cèl es blau coma un agach ; las "porcelanas" que penjan al balcon prenon colors de ròsa. Caldriá pas que gelèsse.

Glossari en clicant suls mots joslinhats
(Glossaire pour les mots soulignés)
Tornar al somari general ?