1 de febrièr 2000

Los borrons de la peuna, dins lo jardin d'ivèrn, son la sola traça ròsa, d'un ròse carmenat, lusent e gras, amb fials pichons d'argent que beluguejan jol solelh palle. Retipan lo blau del cèl. Promessa de la flor a venir, ròsa e blanca, del perfum pebrat. I a tot un mond aquí dedins. Dins qualques meses, se desplegarà, demorarà tres jorns, puèi passirà e vendrà bruna.
Una fuèlha seca de l'estiu passat demòra encara sus la branca e
tremòla dins lo vent agre de l'ivèrn. La cal copar. Servís pas a res. Acabarà amb los autres mòrts del freg : branquetas, vises de la trelha, flors secadas de ramelets passits, plumas de mèrles, òsses d'olivas... E de tot aquel ossuari tornarà nàisser la vida.

Glossari en clicant suls mots joslinhats
(Glossaire pour les mots soulignés)
Tornar al somari general ?