3 de febrièr 2000

Dimars, la Danisa faguèt de milhàs. Anèt crompar farina de milh, puèi metèt l'ola sul fuòc amb d'aiga de la sorga vesina e un pauc de sal. I ajustèt tanben un culhierat de gras de guit, manièra de balhar gost. Quand l'aiga comencèt a cantar, la voidèt dins una caçairòla (al gas, va mai aviat) e ajustèt la farina de milh, tot doçament, en remenar amb lo culhièr de fusta. Aquí te cal d'òli de coide e cal pas aver la canha : remena que remenaràs. La pasta aviá l'aire d'èsser tròp clara ; alavetz metèt un chic mai de farina, e aquò o faguèt duscas que la pasta siá plan cremosa. Quand tot borbolhegèt, èra pas lo moment de s'ocupar del gos, dels gats (lo "Tigron" èra tornat de sas viradas nocturnas !) o de las galinas ( e lo gal que fa lo bèl darrièr la fenèstra : mèfi, quand seràs dins la cosina e dins l'ola, faràs pas tant lo fièr !)... Caliá cochar las bofigas que resquitavan que tot aquò s'atrape pas al fons de la caçairòla ! Alara, pausèt las sietas sus la taula e i espandiguèt dedins la pasta encara tota fumanta. Seriá lèst per deman.
Uèi, prenguèri los plats e los anèrem manjar, passats a la padena e sucrats, en cò dels amics del Belvéser amb lo mond del talhièr de lenga. Cadun aviá portat de
pescajons e acabèrem pel milhàs. Beguèrem de sidra e de vin de ròsas a la mòda d'Apicius que lo Josèp aviá fait. Tornèrem a negra nuèit a l'ostal. Avèm pas passat talent nimai set !

Se volètz véser las fòtos de l'operacion...
Glossari en clicant suls mots joslinhats
(Glossaire pour les mots soulignés)
Tornar al somari general ?