10 de febrièr 2000

Aicí, pas que de gravas. De tèrra ? N'i a pas. Te demandas ont van quèrre la vida per créisser. De gravas blancas, rostidas pel solelh ; i a pas tròp besonh de deserbar, cossí poiriá venir l'èrba ? E dins aquel desèrt blanc, sortisson d'èstres torçuts, en fòrma de femnas que dançan ; son socas de la pèl rufa, d'una color sépia, menadas per la man de l'òme, pas de la maquina. Los podaires, l'ivèrn, emmantelats que s'i vei pas que lo nas, avançan, de son pas regulièr, los cisèus a la man e copan la vise a l'endreit que cal, sens trastejar, amb una abituda que sembla seculària. Los òmes d'un còp èra li an ensenhat lo biais e lo transmeton als mai joves. De còps, sauta una generacion. Ara, i a femnas tanben per far lo mestièr ; son pas totjorn plan vistas mas, s'i fan e, quand capitan, venon - enfin - las egalas dels òmes. Al-dessús d'aquela mar pichona de socas, lo cèl de prima s'espandís ; qualques nivols blanquinejan per far polit. Aquò prepara lo vin de l'annada a venir.

Ara, dins lo país, d'unas vinhas an pas mai de tèrra, res que lo ròc ; l'aigat de novembre emportèt tot e daissèt las socas encrancadas als fials de fèrre, a un mètre en-dessús del sòl. Quant de temps caldrà esperar la recòlta, lo bruch dels tractors e los crits de las còlhas ?

Anatz véser socas en vida...
Glossari en clicant suls mots joslinhats
(Glossaire pour les mots soulignés)
Tornar al somari general ?