21 de genièr de 2000

Trufa que trufaràs... Uèi de matin, anèrem a un mercat de trufas en Quercí. Quin pòble ! e totes amb l'aire de ne saber mai que tu (çò qu'es pas malaisit !). Agachs de coa d'uèlh, signes misterioses que se pòdon captar entre dos vièlhs reganhuts, la casqueta duscas las cilhas, lo tapanàs enrotlat tres o quatre còps a l'entorn del còl, la "canadiana" redde botonada, los uèlhs lusents e lo nas afirolat. Cal dire que lo perfum de las trufas s'espandissiá sens vergonha entre los bancòts raspats ont èran presentadas, qui dins un mocador (pròpre çaquelà), qui dins un tròç de panieron, una boita de plastica o un sac de patanas de 10 quilòs. Es una flaira de paradís que te balha la sensacion d'èsser bandat a-fet, una embriaguesa, una bandada, una ganarra ; ne sortisses completament encigalat !
Dimenge que ven, a Mossolens, dins Aude, i aurà tanben de trufas, salvadas de las aigas de novembre, pas tant coma aval, mas de trufas valentas e que te balharàn lo meteis plaser emai se son paucas.

Glossari en clicant suls mots joslinhats
(Glossaire pour les mots soulignés)
Tornar al somari general ?