16 de febrièr de l'an 2000

Avèm ganhat ! Occitania es independenta e se'n va cap a l'oèst... La longa marcha a començat ! De matin, te desrevelhas, tranquilla ; las novèlas càmbian pas : dos o tres personas encoteladas, un ostal escrancat, Milosevich es encara en plaça ; Pinochet deu mostrar sos papièrs. Tot banha. Lo dejunar, partejat amb los gats : de lait per l'una, de formatge per l'autre. Cool. Te'n vas cap a l'escòla, a mitat dins tos sòmis encara e... subran : oaoooo !!! Una aficha de las bèlas, que fan almens 5 mètres sus 3, te mòstra ta Ciutat de Carcassona, una bandièra occitana sus cada torre. Mancas d'esclafar la mameta que tira sa trigosseta, los dròlles que corrisson que son pel collègi. Mancas de pauc lo vira-l'ase qu'es totjorn al mièg del caireforc. E frenas, enfins ! Qu'es aquò ? What is it ?
Res. Just un sondatge del jornal que
se coita de te dire las novèlas sus l'avenidor del departament d'Aude. 63 del cent d'estatjants estimarián mai dependre de Miègjorn-Pirenèus que non pas de Lengadòc-Rosselhon. La revolucion ! E las bandièras, me diretz ? E ben, son las de la capitala occitana. Non, non, son res que lo lògo del Conselh Regional de M.-P. que tot lo mond sap qu'es la crotz de Lengadòc, pas la crotz occitana que representariá un molon de personas e de tèrras... Anem, te pòdes tornar colcar.

Glossari en clicant suls mots joslinhats
(Glossaire pour les mots soulignés)
Tornar al somari ?