28 de febrièr de l'an 2000

Lo mes de febrièr començava e la prima èra encara luènh. Fasiá un freg de Siberia e nos passejàvem dins Moscó. L'estatua de Marx costejava lo "Bolchoi" ; la momia de Lenin esperava d'èsser rafistolada, tota cussonada qu'èra. La Plaça Roja rogejava jos la pluèja e un bricon de nèu per far color locala. Dins lo metrò, te fasiás arrestar de lònga per de joves que volián te crompar tot : la mòstra, los "jeans", l'estilò e te vendre de caviar o de bilhets russes contra de devisas. Un amic escambièt un bilhet de 200 francs contra bilhets "russes" que lo sèr anàvem sopar al restaurant. Beguèrem la vodcà, mangèrem de caviar e d'autras causas bonas encara. Al moment de pagar, l'amic que nos aviá convidats sortiguèt sos bilhets que se revelèron "tchecs" e que valián quicòm coma 50 francs ! Cadun i anèt de sa moneda e partiguèrem en rire. I a una justícia : los "capitalistas" qu'èrem s'èran faits colhonar per un jove rus que ne deu rire encara !

Empacha pas que Moscó e Leningrad son vilas de sòmi quand òm aima las colors e l'òm gaita pas la misèria umana : ivronhas que se fan embarcar pels policièrs, femnas peladas de freg que copan la glaça e netejan las carrièras, caras tristas dins lo pus bèl metrò del mond e Coca-Cola que t'acuelhís dins l'entrada de l'otèl...

Glossari en clicant suls mots joslinhats
(Glossaire pour les mots soulignés)
Tornar al somari ?