29 de febrièr de l'an 2000

Vegèri a Londres, a la Tate Gallery, una mòstra de Turner. Lo caminament d'aquel pintre sortís de l'ordinari : partiguèt, coma los de son temps, a far marinas, batalhas navalas, classicas e un pauc banalas. Pauc a chapauc, faguèt dintrar la lutz dins sa pintura per arribar a una epuracion totala e desembocar sus la lutz sola. Pas mai de dessenh, res que de colors luminosas. Son tablèu del Batèu negrièr dins la tempèsta es un de los que mai m'agradan : un fum de jaunes, matisats de rossèl, de maurèl que s'acaban en rosses castanhs e lo vermelhau. Qualques tacas de gris-verd, un chic de malva, un pauc de blanc, traças de roge carmenat e de gris encre pels còsses dels negres que se negan. Esbleugissent !

Volètz véser lo tablèu ?
Glossari en clicant suls mots joslinhats
(Glossaire pour les mots soulignés)
Tornar al somari ?