Heure et Date

En Lengadòc

Los mots sotalinhats dins lo tèxte mandan a un glossari.
Nadal a " L'Ametlièr "

(Tèxte mandat per la Calandreta " L'Ametlièr " de Besièrs)

Nadal se festeja lo darrièr vèspre abans las vacanças.

A 2 oras dintram la soca que quauqu'un daissèt dabans la pòrta de la carrièra.

Son lo mai vièlh e lo mai jove de l'escòla, environats per totes los enfants, que pòrtan la soca a la cantina onte se debana la fèsta. Totes acompanhan, rison, cantan.

Cada classa ven a son torn ornar la soca e la sala.

A 3 oras nos trapam totes a la cantina.

Las classas an preparat un present, una poësia, una cançon, un espectaclet, un tèxt... , qu'ofrisson als autres.

Cantam amassa los cants de Nadal que coneissèm e qu'aimam plan. Puèi ven lo moment d'interpelar la soca.

A la seguida de la formula magica dicha per totes :

Botafuòc, Cachafuòc, que nos allegre
e nos fague la gràcia de veire l'an que ven,
e se sèm pas mai, que siàm pas mens.

Lo mai vièlh tusta tres còps sus la soca per faire sortir los presents. Qualques còps cal faire mai d'unes ensages abans que la soca responde (es pas pro fòrt, es sorda, ...)

Dins la banasta preparada per cada classa, los enfants traparàn una suspresa, de bonbons e una doçor.

La tantossada s'acaba dins la cort onte las taulas del vespralh son preparadas amb de bebidas, de còcas e los tretze dessèrts tradicionals.

Lo conselh de regents de las Calandretas de Besièrs

Las Calandretas son d'escòlas laïcas, gratuitas ont l'ensenhament se fa en occitan e en francés ; son d'associacions qu'an besonh d'ajuda e d'argent. Per Nadal, seriá una plan bona idèa de pensar a elas. Per ne saupre mai :

http://www.cco.asso.fr/calandreta/

7, carrièra Franklin 34500 Besièrs tel : 04 67 30 11 97

Tornar al calendièr ?
Tornar al somari ?