Heure et Date

Viatge en Occitania


Los mots sotalinhats dins lo tèxte mandan a un glossari.
(Tèxte de Joan Larzac ; per legir la debuta, anatz veire la pagina de ièr)

Per plan dire, es un pauc mai complicat qu'aquò sembla. Un òme solet, quand seriá lo Papa o lo papagai que diriá Bon Nadal dins totas las parladuras que se parlan, pòt pas far creire a tot lo monde qu'es un compatriòta a de bon. Aquò s'amerita emai, aquò son de causas, tira, que s'ameritan pas coma aquò.

Per s'ameritar la nacionalitat universala, Nòstre Sénher se i es mes a mai d'un. S'es fach provençal en se fasent santon de Provença, e negre en se fasent Crist d'ebena. Es a travèrs d'òmes e de femnas de cada pòble que l'i an prestada sa cara que l'enfant nascut a Betelèm s'es retrobat cuol nud sus la palha de tota paurièira, dins un fum de païses.

Es pas encara universal. L'universalitat es coma l'egalitat. Degús nais pas libre e egal que de la libertat que los autres li daissan e de l'egalitat que li reconoisson. Mas se pòt somiar d'un jorn que totes los abestits nascuts endacòm s'aculhiràn los uns los autres. Aquel jorn d'aquí, l'umanitat de Dieu serà nascuda universala.

Mas Nòstre Sénher es pas nascut onte que siaga. Es nascut sus una tèrra que la cosinalha dels enfants d'Abraam s'espeltiran totjorn. Cadun crei que Dieu a donat aquel recanton de la planeta a l'aujòl d'Ismaël e d'Israël. E que puòi, sens cap d'injustícia de ren, tot l'eiretatge èra passat al pus ainat o al pus aimat. E la Glèisa contunha d'ensenhar aquelas asenadas que valon pas un bram de l'ase de la grépia. Car Nòstre Sénher es nascut aquí per reprene tot a son començament, al primièr òme encara futur, a la proprietat indivisa de la tèrra, a la reconeissença recipròca de las diferéncias, a l'universalitat reçaupuda de l'autre, al sòmi que faguèt lo Paire un jorn que la pichòta Maria se vesiá emparadisada de l'amor de Josèp... e que l'umanitat se trapèt prensa del Filh Unic qu'entre totes siam.

Joan LARZAC

Per s'abonar al Bram dau Clapàs :
Mandar 200 F a Ostal d'Occitania, 1 rue Embouque d'Or 34000 Montpelhièr
tel/fax : 04 67 60 34 81

Tornar al calendièr ?
Tornar al somari ?