La tradicion de l'Òme Nadal

Dels païses latins al Nòrd d'Euròpa, la fèsta universala de Nadal, celebrada dempuèi de sègles, es çaquelà diferenta. Los personatges son variats emai se l'Òme Nadal (Père Noël) demòra lo rèi incontestat de la fèsta. Lo periòd de las celebracions s'esperlonga (s'étend) del 6 de decembre al 6 de genièr segon las contradas d'Euròpa, las costumas e tradicions son plenas de poesia e rampèlan aicí la naissença de Jèsus e aval, lo culte del solstici d'ivèrn, qu'existís dempuèi la nuèit dels temps.
Periòd magic, Nadal anóncia la fin de l'ivèrn, la debuta del reviscòl de la natura.
Atal, Dinamarc e Norvèga que vivon tot l'an amb los "Juhles", pichons farfadets terrèstres e aerians, protectors dels òmes, de la natura e dels animals, sortisson de l'estable la nuèit de Nadal per amagar los presents dels mainatges.
Los pichons Norvegians seguisson totjorn una vièlha tradicion viking : passan d'ostals en ostals, reclaman doçors, vestits de rennas, devon pensar a "Nisse", lo farfadet protector dels animals que risca d'i far un missant torn se doblidan son bòl de farinetas. Los pichons Finlandeses son tanben fòrt pròches de la natura e sustot dels aucèls que noirisson de graminèas per que pòscan subreviure al freg dins aquel periòd de fraternitat e de renforçament dels ligams familials.

L'Islanda per ela, s'acontenta pas d'un sol Père Noël mas de 13 bonòmes afroses, vestits de pelhas que rampèlan los "trolls" de las legendas nordicas e als noms evocators : Flairaire, Claca-Pòrta, Vejaire, Pica-Salcissa, Lèca-Caçòla...
D'Alemanha a Eslovaquia passant per l'Alsàcia-Lorrèna, Belgica, Soissa e Austria, lo personatge magic de Nadal se sona Sant-Nicolàs. Desbarca lo 6 de decembre, los braces cargats de presents e de doçors pels enfants, e es atal que començan las festivitats. A l'imatge del Père fouettard qu'acompanha l'Òme Nadal, "Hans Trapp" es lo missant armat d'un baston castigant los enfants que son pas estat sages...

Mai al sud, los enfants Italians e Espanhòls espèran lo 6 de genièr, jorn de l'Epifania (visita dels Rèis a l'enfant Jèsus) per reçaupre sas joguinas. Dins lo cèl italian, es la Befana, vièlha bruèissa espaventabla mas simpatica que, crincada sus son engranièra, distribuís los presents als enfants. Tandís qu'en Espanha, Gaspard, Melquiòr e Baltazar son encargats d'aquesta nòbla mission...
De fait, son d'Olandeses emigrats als Estat-Units aprèp la Refòrma qu'an emportat amb eles lo personatge de Sant-Nicolàs que venguèt Santa-Klaus vestit d'Òme Nadal.
La tradicion es pas occitana, mas se l'òm doblida lo costat mercantil de Nadal, demòra un moment de fèsta, subretot pels pichons...

tornar
al somari general ?