L'estragon
Nom botanic : Artemisia dracunculus, A. redowskii.

L'estragon es una èrba fòrt presada dins la cosina francesa : es l'una de las èrbas finas amb lo jalverd, lo cerfuèlh, la ciboleta, e de còps una de las èrbas de Provença (origan, sadrèia, romanin, majorana, farigola). Es indispensable dins un fum de salsas : bearnesa, gribicha, tartara, ravigòta, ...

Son nom ven del latin dracunculus : " dragon pichon " desformat lo long dels sègles e de las lengas.

Istoric

Originari de las estepas de l'Asia centrala, l'estragon èra ja conegut per Dioscoride coma l'èrba als dragons. Grècs e Romans la cresián eficaça contra las mossegadas de sèrps. En Índia, lo chuc d'estragon e de fenolh èra una beguda unicament reservada als sobeirans. Avicenne nos indica dins son " Canon de la medecina " que l'estragon èra fòrça utilizat pels pòbles arabs contra las mossegadas de vipèras, contra la pèsta e lo colerà. A la fin de l'Edat mejana, l'estragon es introdusit en Euròpa pels Crosats per una utilizacion pròcha de las que describon Avicenne e Dioscoride ; mas sa galenica càmbia : òm aima mai l'utilizar jos fòrma de licor... Apareis en França al sègle XVI demèst las èrbas cultivadas pels monges (sens cap de reticéncia, qu'es una de las raras plantas aromaticas que li prèstan pas vertuts excitantas o afrodisiacas !).

Cresenças

En Euròpa, es tradicionalament utilizat per calmar lo mal de dents.

En infusion, contra las insomnias.

Vertuts

Estomacal, carminatiu, aperitiu, vermifug
Emmenagòg
Estimulant
Diuretic

Biaisses e astúcias

Lo cal absoludament utilizar fresc que pèrd fòrça perfum al secatge.

La planta

Artemisia dracunculus, A. redowskii.

Familha de las asteracèas o compausadas.

Planta vivaça de 0.7 a 1.2 m de naut.

Cambas regdas e quilhadas.

Fuèlhas alongadas e d'una flaira fòrta.

Flors escassas dins nòstras contradas.

Reproduccion principalament per division de las matas.

Palhar per l'ivèrn, que crenhís lo gèl.

Mèfi : lo cal pas confondre amb A. dracunculoides o estragon de Russia qu'es mai robust mas inodòr e sens sabor.

 

Tornar al calendièr ?
Tornar al somari ?
Tornar a l'indèx ?