Lo monde de las espècias...
PER VOS BALHAR ENVEJA...

Lo mot " espècia " nasquèt al sègle XII dins la lenga francesa, del latin species. Designava denrèas de tota mena, aromats, medicaments, fruchas o produchs de la tèrra. Es lo mot de species aromatica que designèt doncas las espècias e los aromats.

Lo mot species balhèt :

espècia en occitan, especia en castelhan

spezie en italian, l'apoticari estent lo speziale

spess en wallon

spiceri nom modèrne del farmacian en Tunisia.

Lo mes d'octòbre passat, lo cercle occitan de Carcassona presentèt una mòstra, "Istòrias d'espècias, Histoires d'épices ", a Puègnautièr.
Mercé a Miquèla Estada e Felip Mongin, aquesta mòstra es estada una vertadièra capitada. Podètz veire qualques fòtos de la mòstra en clicar
aicí.
Nos podètz escriure se la volètz mostrar en çò vòstre.

DEFINICIONS DEL MOT ESPÈCIA

LA GRANDA ENCICLOPEDIA
Las espècias son substàncias aromaticas tiradas d'unes vegetals, emplegadas coma condiments per relevar la sabor dels plats, perfumar begudas. Activan las foncions de l'estomac.

LITTRÉ
Tota dròga aromatica o picanta qu'òm utiliza per assasonar (o adobar).

GRAND LAROUSSE ENCICLOPEDIC
Substància aromatica e vegetala servissent a l'adobament dels plats.

DEFINICION D'AROMAT

Tota substància estrangièra ajustada a un aliment o beguda per modificar sa redoléncia per l'efièch de sa redoléncia pròpria.

DEFINICION DE CONDIMENT

Origina latina, condimentum, de condire : confir, adobar. Per Columelle al sègle I, condita solida designa las espècias.
Uèi, se designa atal una preparacion ajustada als aliments cruses o cuèits per ne relevar la sabor.
Entre aquestes tres tèrmes, los limits son pro ben foscs e los distinguir manca d'interès ja que segon los diccionaris, las regions o los païses, d'unas substàncias càmbian de categoria.

Se pòt rasonablament adoptar lo principi seguent :

Los aromats son plantas indigènas
Las espècias venon de regions tropicalas.
Per acabar, prenèm l'exemple dels grècs que designan d'un mot unenc pharmakon, lo condiment, l'aromat, l'espècia, lo medicament e l'afrodisiac…

Tornar al calendièr ?
Tornar al somari ?
Tornar a l'indèx ?