Sètz a escotar "Doça nuèit", interpretada per l'Andrieu Denat que m'a autorizada a la vos far escotar ; plan mercé !
La velhada
de Nadal

Avètz escrit a l'òme Nadal ? I cresètz ? I cresètz pas ? Es pas tròp grèu. Vaquí una letra que ven d'èsser editada per la colleccion Vendémias de l'Institut d'Estudis Occitans-Aude. Son autor, Alan Roch, escriu unes "Papieròts romegaires" (que podètz comandar aicí) dins un setmanièr del Menerbés que se ditz " La Semaine du Minervois ”. Vaquí sa letra que la poiretz legir lo temps de la velhada nadalenca, entre dos "mendicants" dels tretze dessèrts :

SUFÍS D'I CREIRE...

Quand siás cronicaire, e mai dins un grand jornal coma La Semaine, quand ven Nadal, e ben, te cal pas embestiar : fas ta letra a l'Òme-Nadal, e zo ! As un tèxte original que te disi pas !

Doncas, coma sabètz plan que los occitanistas sèm passadistas que se pòt pas dire ni creire, vau un còp de mai celebrar aquela tradicion en escriure quauquas linhas al Grand Barbut del Pèl Blanc, blanc del tant de lagui que se fa per nòstra paura umanitat.

Preni ma pluma d'auca (non, non ! vos dirai pas s'es cuèita, mièg-cuèita e se ne chuqui la punta amb un veirat de Juranson o de Sant-Joan de Menerbés ! ) :

« Brave Òme-Nadal, se m'ausisses per-delà lo rambalh, la sisa d'ozòna e los fums, pel 25 de decembre e l'an qu'arriba, aquí los presents que nos poiriás menar :

- faire petar las darrièras muralhas de Berlin : la fin defintiva de las frontièras cantonalas e departamentalas per que 2003 veja enfins la reünificacion de Menerbés !

- las paraulas de « Vira-vira pichon molin ! », contairòla enfantina, per totis los opausants a las eolianas

- tres grans de consciéncia al Domenge Baudís que, coma Tolosan celebra los « Ramon » dins sos libres, e coma president del CSA balha pas de frequéncia a Radio Lenga d'Òc a Montpelhièr

- tres ferrats de consciéncia als deputats per que tornen sul pietadós debate de la fin de novembre ont refusèron un còp de mai de marcar lo respècte e la reconeissença de las lengas regionalas dins la Constitucion

- que l'aiga demòre al riu, frèsca e clara, per asagar los òrts e nos refrescar lo gargalhòl e pas mai !

- que los colombs de la patz pòrten quatre branquetas d'olius (sabi plan que lo Marty de L'Oulibo va romegar, mas es per la bona causa…) a Bush, Saddam Hussein, Sharon, Arafat (e a plan d'autres !) »

Nadalet Roch

A deman...
Tornar al calendièr ?
Tornar al somari ?
Tornar a l'indèx ?