Calendièr de l'Avent de 2004

Lo conte del brasegon
contat per la Chantal Canal
Tornar al calendièr de l'Avent ?
Tornar a l'index ?
Tornar al somari ?

Sabes de qu'es lo brasegon ? Non ?

Se te passejas dins la garriga, per Nadal, rescontraràs benlèu dins una comba, a l'ombra, una planta polida, a las fuelhas lusentas, que pòrta de bòlas rojas coma la brasa del fuòc. Es lo brasegon.
Sabes d'ont l'i venon aquelas bòlas rojas ? Non ? Escota plan, te ba vau dire.
Segurament que, quand èras pichon, lo papeta e la mameta t'an contat que la nuèit de Nadal es una nuèit magica ont las bèstias parlan la lenga dels òmes.

Lo matin de Nadal lo gal se lèva e crida : " Jèsus Crist es nascut ! "
La vaca demanda : " A ont ? A ont ? "
La feda respond : " A Betelèm, a Betelèm !!! "
L'ase brama : " I cal anar, i cal anar ! "

L'ase aviá bramat : " I cal anar, i cal anar ! " e totas las bèstias s'èron encaminadas amb el cap a Betelèm.

Dal temps que caminavan, lo paure ase s'avisèt que caduna portava qualque present per lo nenon que veniá de nàisser. La vaca portava lo lait, la galina, l'uòu e la craba, de bon formatge. El, aviá pas pres res. Aquò lo tafurava e se'n voliá mal.

" De que va dire de ieu nòstre Sénher ? Dirà que soi un ase e aurà plan rason. "

Tot pietadós, èra a mand de passar la pòrta de l'estable quand avisèt una bèla mata de brasegon.

" Qu'es polida aquela planta, amb sas fuèlhas lusentas e vernissadas. Ne'n vau culhir un ramelet e ne'n farai present al pichon Jèsus " se diguèt tot content.

Sarrèt las dents sus las branquetas a las fuèlhas escosentas e dintrèt triomfant dins la grépia sens faire cas de la sang que rajava de sos pòts e que tombava sus las fuèlhas.

Nòstre Sénher ne siaguèt tocat e volguèt que d'aquel jorn, lo brasegon portèsse de fruts roges coma de pèrlas de sang en sovenir justament del pichon e dolorós present del paure ase.

E tric tric, mon conte es finit,
e tric trac mon conte es acabat.


Una joguina per Nadal ; per la fabricar, : clicatz !