Femnas e escrivanas :
las trobairitz

Las trobairitz, femnas poètas del temps dels trobadors, an compausat, de 1150 a 1250, unis poèmas que respondián a los dels trobadors. Es una forma originala de la literatura femenina.

Son importantas, aquelas femnas, a mai d'un títol : sul plan literari, son incontestablament tant excellentas coma lors correspondents òmes, sul plan de l'inspiracion es quicòm d'extraordinari, vist lo contèxte social de l'epòca.

Se cal rapelar que l'Edat Mejana èra pas una epòca agradiva per las femnas : La misoginia ambienta, eiretada benlèu de L'Art d'aimar d'Ovidi, aviá una influença fòrta. Aquel brave poèta latin parla de la Femna coma d'un mal necessari que l'Òme se'n deuriá saber passar ; lo " bon remèdi " que pòt garir la plaga d'amor es la mòrt del desir de la Femna. Un nommat André Le Chapelain, jol règne de Felip-August (a l'entorn de 1180), escriguèt lo De amore, compta dètz-e-sèt rasons de se téner luènh de l'amor en citant una lista de las flaquesas de la femna per dire d'abandonar l'amor, e doncas la femna. Aqueste libre, de tradicion ovidiana, es contemporanèu de l'amor cortés. Rapelatz-vos tanben que lo dreit de cuèissa (droit de cuissage) se practicava encara al sègle XII. De fait, lo ròtle de las femnas se limitava a far d'enfants, se possible mascles ; per çò qu'es del maridatge (cò dels potents, plan segur) servissiá a crear aliganças politicas.

En contra, la situacion privilegiada de las femnas nòblas d'Occitania èra puslèu una excepcion. Abans d'abordar las circonstàncias istoricas que faràn nàisser las trobairitz, cal comprene lo còdi de la fin'amor e la filosofia dels trobadors. Se l'òm fa la comparason entre lo genre dels trobadors e lo de las trobairitz, se vei clarament que las femnas an pas simplament imitat l'estil dels òmes, mas que n'an creat un original.

Pèire Bec afortís : " C'est vraisemblablement sur l'initiative (des femmes) que la fin'amor est devenue le thème central de la poésie et de la société aristocratique. En protestant contre la tutelle du seigneur féodal et la traditionnelle discrimination dont elles faisaient l'objet, elles ont incité les poètes de cour à mettre l'accent sur la domination, au moins poétique, de la dame, et, en contrepartie, la soumission de l'homme à leur bon vouloir.


(De seguir deman...)

Tornar al Calendièr de l'Avent ?
Tornar al somari ?
Tornar a l'acuèlh ?