Olympe de Gouges

Contunham nòstres rescontres amb las femnas occitanas mai o mens conegudas ; ne sèm a l'epòca de la Revolucion.

Maria Gouzes nasquèt a Montalban en 1748 e moriguèt a París lo 6 de novembre de 1793. Son paire èra maselièr (boucher) e sa maire sirventa.

D'unes la pretendon filha naturala del marqués Le Franc de Pompinhan ; d'autres pensan que seriá una bastarda de Loís XV… Qaund òm li demanda, respond : " Siái pas filha de rei mas d'un cap coronat ".

Se marida, a un dròlle, mas far la borgesa en " província " aquò li agrada pas e " monta " a París.

Sómia de celebritat, escriu articles e pèças de teatre e se farga un nom d'escrivana : Olympe de Gouges.

Al moment de la Revolucion, se lança dins la luta per l'egalitat dels dreits. Escriguèt una seria de tèxtes politics sus l'istòria de las femnas e en favor de la supression de l'esclavatge.

Li arribarà de provocar d'òmes en duèl quand dison pas de ben de sas òbras !

A comptar de 1791, publica un tèxte que farà data dins lo feminisme :
" Declaracion dels dreits de la femna e de la ciudadana ", en francés plan segur. L'article 1 disiá : " La Femme naît libre et demeure égale à l'homme en droit ". Dins lo " Postambule ", se legissiá tanben : " Femme, réveille-toi ; le tocsin de la raison se fait entendre dans tout l'univers, reconnais tes droits. (...) L'homme esclave a multiplié ses forces, a eu besoin de recourir aux tiennes pour briser ses fers. Devenu libre, il est de venu injuste envers sa compagne. Ô femmes ! Femmes, quand cesserez-vous d'être aveugles ? "
Un an aprèp aqueste tèxte, en septembre de 1792, la Revolucion rendiá legal lo divòrci.

Dins la Revolucion, Olympe de Gouges defendiá lo punt de vista dels Girondins (contra los Jacobins). Foguèt acusada d'aver calomniat los representants del pòble, condemnada a mòrt e executada lo 2 de novembre de 1793. Al moment de montar sul cadafalc (l'échafaud), Olympe cridèt : " Enfants de la Patria, venjaretz ma mòrt ! "

Tornar al Calendièr de l'Avent ?
Tornar al somari ?
Tornar a l'acuèlh ?