Del Yemen al cèl de la boca...


Du Yémen au palais...

Color cafè, que t'aimi ò color cafè ! 
La cultura del cafè

Lo cafeièr florís tre sa tresena annada. Fa floretas blancas que la flaira se sembla fòrça a la del jansemin (jasmin). Longtemps es estat nomenat " Jansemin d'Arabia ".

Las fruchas son maduras 8 a 10 meses aprèp la florason. Fa fruchetas (baies) d'en primièr pichonas e verdas, puèi roge encre (escur), d'aquí son nom de " cerièra ".

Las doas espècias màgers de cafè son l'Arabica e lo Robusta.

D'unes plantaires se son meses a la cultura biologica.

naut de pagina
Los benfaits del cafè

Tanlèu descobèrt, s'utilizèt lo cafè per sas vertuts medicinalas. Li trapavan un fum de qualitats : esclarcir las idèas, calmar lo mal de cap e favorisar l'endormiment.

Uèi, la medecina a confirmadas las proprietats del cafè, que son sustot las de la cafeina. Per una persona en bona santat, lo cafè pòt :
- estimular las foncions cerebralas
- prevenir las crisis d'asma
- estimular lo sistèm urinari (es diuretica)
- favorisar la secrecion gastrica e agir d'un biais tonic sus la foncion intestinala
- pas modifiar la foncion cardiaca, ni la tension arteriala.

Quin bon medicament !!!

naut de pagina
Las recèptas
Tiramisu-bescuèits "culhèrs"

Çò que vos cal :

- Crèma Tiramisu
1 dl de lait al cafè fresc sarrat
90 g de jaune d'uòu (se ditz tanben "rosset" (3 a 4 uòus)
85 g de sucre cristallizat
40 g de glucòsa
una taça de cafè fresc sarrat
1/2 baston de vainilha
400 g de mascarpone
400 g de crèma bufada (soufflée)
50 g de sucre invertit
5 fuèlhas de gelatina

- Salsa cafè
2 dl de cafè fòrt
5 cl d'amaretto (liquor que se trapa aisidament)

Recèpta :

Rasclar la pulpa del baston de vainilha. Dins una caçairòla, barrejatz la vainilha al lait. Ajustatz lo cafè sarrat, lo sucre, los rossets e lo glucòsa. Faire caufar a fuòc doç en remenant e daissar cuèire fins a obténer la consistància d'una crèma anglesa. Vojatz lo tot dins un robòt mesclaire e, al foet, faire enfregir. D'aquel temps, dins un bòl, barrejatz lo mascarpone a la crèma bufada e lo sucre invertit. Metre amassa (ensemble) las doas preparacions dins lo meteis bòl e ajustatz-i las fuèlhas de gelatina trempadas a l'aiga freja puèi escoladas.

Presentacion :

Banhatz los bescuèits "culhèrs" dins la salsa cafè (cafè + amaretto). Pausatz al fons del plat de servici. Cobrir de crèma Tiramisu fins al bòrd. Daissar enfregir qualques oras al frigò. Decorar amb lo cacao en polvera.

Fuelhetat de Gorgonzola
al cafè leugièr aromatisat
e a la mèl de gigibre (gingembre)

Çò que vos cal per 4 personas :

- Un paquet de pasta fuelhetada tota prèsta
- 150 g de gorgonzola
- 3 culhèrs a sopa de mèl de càcia (accacia)
- 1 rasiga pichona de gigibre fresc
- un chic de cafè leugièr
- un uòu

Recèpta :

Pausar lo gorgonzola sul fuelhetatge descopat en cercles de +/- 15 cm de diamètre. Pegar lòs bòrds de la pasta a l'aiga freja. Plegar la pasta per obténer una mièja luna. Pausar las mièjas lunas sus la placa del forn un pauc banhada. Amb un pincèl, pintrar la pasta amb un uòu entièr batut e un pauc salat. Faire qualques dessenhs amb una forqueta. Faire cuèire los fuelhetats al forn a 220°C a pauc pres 20 minutas. D'aquel temps, faire fondre la mèl amb un pauc d'aiga e lo gigibre fresc raspat. Aprèp qualques minutas d'infusion, ajustar un pauc de cafè fòrt.

Passar la salsa al curvèl (tamis) fin. Vojar sus la sièta cauda e dispausar lo fuelhetat sus la salsa.

naut de pagina
Deman, un darrièr cafè per la rota...
Tornar al calendièr de l'Avent ?
Tornar al somari ?