Per cosinar Nadal...
Los mots sotalinhats son revirats en francés ; basta clicar dessús.

Sabèm totes que Nadal es, a l'origina, una istòria de paures emigrats, caçats per tot lo monde que trapan pas qu'un estable per se metre a l'abric e acochar.
Bon. Ara, aquel temps de Nadal es vengut temps de gormandisa, de consomacion a tot pèrdre. Entre los dos, podèm causir de festejar tot pensar e agir pel monde que n'an de besonh (
Comptan sus vos !).

Doncas uèi : fetge gras crus e en terrina !

 

Fetge gras crus a la sal

Netejar lo fetge gras en lo far trempar dins d'aiga freja salada e amb un chic de vinagre, una nuèit. Puèi, separar los dos lòbes e tirar los nèrvis e las venas. Plan secar e asagar amb un pauc d'Armanhac, de Juranson o de Sautèrnas.

Adobar amb sal de fetge gras : 150 gr de sal, 30 gr de pebre del molin,15 gr de muscada raspada, que metètz a l'endedins e a l'exterior del fetge. Plan sarrar dins una tòrca e pausar al frigò en lo virar cada 12 oras.

Se pòt tanben netejar lo fetge, lo sarrar dins una gasa (se vend dins las farmaciás) e salar un pauc mai que quand la sal es directament al contacte del fetge). Botar al frigò. Per servir, enlevar la gasa e lo fetge sortís sens cap de traça de sal pegat dessús.

Temps de passatge al frigò :
1 jorn entièr per obténer un fetge a pena cuèit
2 jorns per un fetge a mitat-cuèit
3 jorns per un fetge cuèit
4 jorns per un fetge plan cuèit.

Bon apètis !

Fetge gras en terrina

Netejar lo fetge gras en lo far trempar dins d'aiga freja salada e amb un chic de vinagre, una nuèit. Puèi, separar los dos lòbes e tirar los nèrvis e las venas. Plan secar e asagar amb un pauc d'Armanhac, de Juranson o de Sautèrnas).

Pausar dins una terrina, los lòbes mai polits dessús e dejós, los mai pichons al mièg. Cobrir amb un film e gardar al frigò pendent una nuèit.

Remplaçar lo papièr-film per un papièr d'alumini. Metre a cuèire al banh-maria pendent 80 min a 70°C. Verificar de temps en temps en botar lo det al mièg. Cal que siaga tebés.

Tirar del forn e del banh-maria. Daissar enfregir. Recuperar lo grais en tròp e lo gardar.

Pausar una planca de la dimension de la terrina envelopada de papièr d'alumini sus la terrina e metre per-dessús un pes (bóstia de consèrva de 250 gr) de cada costat. Gardar al frigò per 1 ora a pauc pres.

Enlevar la planca. Lissar la susfàcia. Cobrir amb lo grais fondut e tebés. Tornar metre al frigò e manjar l'endeman.

Bon apètis !

 

Veire una fòto del fetge acabat ?

Una autra fòto de capitada ?

Tornar al calendièr de l'Avent ?
Tornar al somari ?