Lo Mistèri del Lipeton

Esteleta e Riquet son dos amics que jògan sovent ensems. Lo jorn que vos disi èran partits jogar dins lo bòsc, mai au moment e se'n tornar al vilatge trapèron pas pus lo bon camin per dintrar. S'èran perduts. Urosament, qu'aval darrièr los arbres, devinhèron un ostal. Aquí anèron per demandar son camin. Butèron lo portalàs de ferre, dintrèron dins lo pargue, se sarrèron de la pòrta d'intrada. Tustèron... Silenci.
- Òu ! I a quauqu'un ? Tustèron mai fòrt... Degun.
- Benlèu qu'ausisson pas, s'ensajàvem d'intrar ? diguèt Esteleta.
A mai s'aviá un pauc la peta, Riquet virèt doçament la ponhada e butèt la pòrta. Intrèron a la chut-chut. Lo còr fasiò tifa-tafa. « I a quauqu'un ? » Degun ! Riquet e Esteleta espepissèron lo membre. Quant vegèt un grand armari. Esteleta gaitèt son amic coma per dire : Dobrissi ? Mai esperèt pas la responsa e d'un còp dobriguèt las doas pòrtas. Riquet, el, començava de se despacientar :
- Anem ! Esteleta, nos cal partir !
- Veja ! Veja ! diguèt ela.

Dins l'armari i aviá de farina, de sucre, d'uòus, de lach, de burre, mai tanben de prunas e de pomas d'amor.
- Mai qual es que pòt ben demorar aicí ?
- Anem, diguèt encara Riquet, n'i a pron, nos cal partir.
- Espèra, espèra, diguèt Esteleta. E dobriguèt un tirador de l'armari. Sabètz pas çò que i aviá dins lo tirador ? De forquetas ? De cotèls ? Non pas ! I aviá pas que de pichons culhièrs.
- Curiós, se diguèt Esteleta...
- Escota, Esteleta, ieu me'n vau, ara.
- Espèra Riquet, i a una portanèla aquí ! E tot disent aquò, ensajèt de dobrir la portanèla que demorèt barrada. Just a aquel moment, Riquet que partissiá, butèt un crit :
- Gaita ! Gaita !
Darrièr la pòrta d'intrada, un papieron èra ficat.
Aquí çò que i èra escrich :
Soi ieu Lipeton, sabi que sètz perduts. Vos ajudarai per tornar al vilatge se capitatz de fargar una recepta amb de causas que son dins mon armari.

Quina istòria ! Èran ben engarçats los dos amics. E coma volián tornar al vilatge ensajèron de fargar una recepta.

E vos ? Es que podètz ensajar de fargar un recepta amb çò que i a dins l'armari del Lipeton ?
la seguida en dessenhs...
somari “ pichons“ ?