A tres minutas prèp...

Dijòus 11 de novembre, a Carcassona :

França : 20 - Novèla-Zelanda : 24

Lo XIII de França nos surprendrà totjorn ; passat a la molineta fa dètz jorns per la jove formacion anglesa (42-4), an sortit una partida de primièra contra los Neo-Zelandeses aqueste 11 de novembre sus la pelena de Domèc.

Fasiá un temps a pas metre un quioí defòra : la pluèja tombava fina. Los Negres presentavan una formacion atletica, mas los Blaus se mostrèron solidaris per placar, placar e placar. Mas tanben per prendre coratjosament d'iniciativas. Sus una pauma tombada pels Neo-Zelandeses, Gressèque marcava al pè de las barras. Los Negres anavan prene l'avantatge amb dos ensages en creant lo surnombre en cap de linha (8-6). A una minuta de la pausa, lo darrièr Quioí controtlava pas un còp de pè a seguir de Gressèque e Sirvent marcava. Amb la transformacion de Gressèque (encara el !), aquò fasiá 12-8 al moment de s'anar rescalfar dins los vestiaris. (Seguís dins la colona de dreita...)

... A la represa, sus una ataca generala, Toopi tornava balhar l'avantatge als jogaires d'Oceania. França egalizava sus una penalitat e lo melhor èra a venir : uan majestuosa passa al pè de Gressèque per Couturier en posicion d'alièr que remetiá a l'interior per Zitter : 20-14 pels Blaus !!! Un objectiu : téner, téner, téner. Vint minutas encara. Los negres s'installavan dins los 20 m occitano-catalans. Capitavan a passar un primièr còp amb un ensag litigiós. La pauma de la trasformacion èra remandada pels potèus. Uèit minutas encara a jogar e 20-18 pels Blaus. Mas, un còp de mai, a tres minutas de la fin, lo segonda linha Lauti'iti serpentejava dins la defensa blava e balhava la victòria a sa formacion (24-20).
Los Blaus s'èran plan batuts de totas sas fòrças e aurián meritat de conéisser lo gost sucrat de la victòria amb un Maxime Gressèque imperial en cap d'orquèstre e una equipa valenta que se pòt pas dire !
Lo public saludèt los valeroses jogaires e ne torna demandar.

D e confirmar, mas la Novèla-Zelanda èra pas qu'un afogasset amb lo plat de resisténcia que son los Cangorós a afrontar aqueste dimenge 21 de novembre a Tolosa (Sèt-Denièrs).

Los Blaus : Guigue (UTC) ; Zitter (TO), Couturier (TO), Hermet (Vilanòva), Sirvent (St-Gaudenç) ; Max Gressèque (Pià), Rinaldi (cap, UTC) ; Mounis (UTC) ; Fakir (UTC), Elima (Wakefield) ; Ferriol (Limós), Berthezène (UTC), Fellous (UTC) ; Pramil (ASC), Gay (TO), Ragun (TO), Carrascò (Vilanòva).

La marca :
França :
3 ensags per Gressèque (6), Sirvent (39) e Zitter (56) ; 3 transformacions e una penalitat (50) de Gressèque.
Novèla-Zelanda : 5 ensags per Toopi (20,46), Hape (25), Wiki (71) e Lauti'iti (76) ; 2 transformacions (46, 76) de Paul.

Tornar a las Rubricas ?
Tornar al somari ?
Tornar a l'index ?