7ena jornada : Un dimenge fregeluc

Las resultas :
- dimenge : FCL-ASC : 29-36 ; Pià-Vilanòva : 24-16 ; Tolosa-St-Gaudenç, Lion-UTC e Vilafranca-Limós : pas jogats

Lo classament :
1) UTC : 18 punts (6 partidas) ; 2) Limós : 16 punts (6) ; 3) Tolosa : 15 punts (6) ; 4) St-Gaudenç : 13 punts (6) ; 5) Pià, Lesinhan : 13 punts (7) ; 7) Carcassona, Vilanòva : 12 punts (7) ; 9) Vilafranca : 9 punts (6) ; 10) Lion : 6 punts (6)

En tres passas :

- Glacial : Coma se fasiá pas pro freg al Molin, la Federacion aviá designat per arbitrar lo derbí En Fregeluc (M. Frileux) !

- A la ràdio : Decibel FM (dins lo nòrd d'Òlt), fa lo punt sul XIII, en dirèct, cada diluns entre 19 h e 20 h dins l'emission d'Estève Clerc L'Odyssée du Sport. Retransmission lo dimars a 15 oras.

- Cambajon : L'amic Dodó fa saupre a la populacion que lo cambajon que se ganhèt a la borricha d'ASC-St-Gaudenç èra plan bon, mas que ne demòra pas mai !

La partida : Lo freg reviscòla lo Canarí

Aprèp la mai que trista partida fàcia a Pià, l'entrainaire Sokolow presentèt sa demission e foguèt remplaçat per Simon Dorrell : lo famós tust psicologic. E aquò marchèt : atal, los jogaires jaunes e negres que se trigoçavan sens èime e sens vam la setmana passada a la Pepi presentèron al Molin una equipa valenta, solidària, dinamica e inventiva ! Las condicions èran pas de las primièras per desvolopar un bon rugbí : una freg que pelava, un vent que bufava a arrancar las alas d'un molin ! « Un vin caud de 12°2 vos rescalfarà » çò fasiá lo barjacaire de servici.

Los Verds e blancs dobrisson la marca sus un tombat de Munoz, mas Beattie pren lo trauc e marca. Lesinhan replica per Couttet e profita d'una pauma perduda per la mesclanha carcassonesa per doblar la misa, mas las dètz darrièras minutas de la primièra part van èsser pels Canarís que marcan tres còps per Dean, Beattie puèi per Trudgett just abans lo còp de còrna aprèp una polida escapada : 20-11 per Carcassona a la pausa.

Mas, ara, es a Lesinhan de jogar ambe lo vent. Sus un còp de pè de desplaçament de Gibson, Benausse rauba la pauma al nas de Duzzant e marca : 24-11. Selles intercèpta e marca, puèi Lesinhan tòrna a un punt per Lavaux. Un pauc de mica-maca e un Verd puèi un Jaune se ganha un repaus de 10 minutas. Mas la fin de partida serà tornarmai pels visitors : Beattie capita a passar lo braç entre los defensors per aplatir e lo pilar Pramil jòga al pè per el : 36-23. Se Couttet se paga un ensag de nonanta mètres aprèp intercepcion, es tròp tard : Carcassona ganha 36-29 e comença enfins lo Campionat a de bon ! De confirmar tre dimenge fàcia a d'autres Verds e blancs : los de Vilanòva.

Lo comentari : Pas que doas partidas

Lo freg, la nèu e lo glaç son venguts balhar un còp de fren a l'anar del campionat. Las causas se complican : classament malaisit de seguir, calendièr que va anar de guingòi... Pià e Carcassona ne profitan per remontar al classament.

La dimenjada venenta :

Vilafranca-Lion ; Limós-Tolosa ; Carcassona-Vilanòva ; Pià-Lesinhan ; UTC-St-Gaudenç.

Sus Internet :

- Lo site novèl de l'ASC XIII

Tornar a las Rubricas ?
Tornar al somari ?
Tornar a l'index ?