Tolosa en dalfin

Las resultas :
Vilafranca-Lion : 60-10 ; Limós-Tolosa 22-32 ; Carcassona-Vilanòva : 19-18 ; Pià-Lesinhan 34-8 ; UTC-St-Gaudenç : 46-10

Lo classament :
1) UTC : 21 punts (7 partidas) ; 2) Tolosa : 18 punts (7) ; 3) Limós : 17 punts (7) ; 4) Pià : 16 punts (8) ; 5) Carcassona : 15 punts (8) ; 6) St-Gaudenç : 14 punts (7) ; 7) Lesinhan : 14 punts (8) ; 8) Vilanòva : 13 punts (8) ; 9) Vilafranca : 12 punts (7) ; 10) Lion : 7 punts (7)

En tres passas :
- Campions : Sus sa pelena, la còlha dels Leeds Rhinos se ganhèt lo World Club Challenge fàcia a l'equipa australiana dels Canterbury Bulldogs : 39-32 davant 40000 espectators.

- Represa : En esperant l'UTC en 2006, la Super League tòrna prene aquesta dimenjada amb 12 equipas en competicion : 6 aniràn en pelhòfa e 2 davalaràn per faire plaça als Catalans e a una autra equipa anglesa.

- Tarrencs : Los 1/4 de Copa de França se debanaràn lo dissabte 5 de març : Limós-St-Gaudenç a Carcassona e dimenge 6 de març : Salsas-Vilanòva a Pià, Lesinhan-Tolosa a Limós e UTC-Vilafranca a Albí.

La partida : Nos faràn perir !
Carcassona entamena amb lo vent, mas perd una pauma e Vilanòva ne profita per dobrir la marca : 6-0. Chaboud recupèra una candèla, puèi Dean clava un moviment collectiu : 12-6 per Carcassona. Mas Vilanòva marca dos còps mercé a una pauma jogada al pè e quichada per Tutard, puèi per Nicolau Hermet que trauca la defensa locala : 18-12 pels visitors a la pausa.

A grands còps de pè, Vilanòva ensaja de remandar Carcassona dins sa part de tarrenc, mas los jaunes e negres s'installan dins los 22 aquitans. Banquet passa una penalitat, Beattie marca : egalitat al cap d'una orada de jòc. Carcassona multiplica las combinasons, ensaja totas las possibilitats de còps de pè a seguir mas i a totjorn quicòm : un pè, una man dels Leupards, una fauta, un còp de fiulet de l'arbitre... La solucion, vendrà d'un tombat. Un primièr còp, la pauma passa entre las barras mas es estada contrada. Fin finala, la segonda tentativa de Trudgett a una minuta de la còrna serà la bona : 19-18 per l'ASC ! Una victòria malaisida de bastir, de bonas intencions mai que mai dins la segonda part que lo nhac es pas de longa de sortida. Anem, vai, lo moral es melhor qu'una quinzenada en rè !

Lo comentari :
L'UTC perseguís sa corsa solitària : aqueste còp, son los Campions de França qu'an pagat l'adicion. A Limós, sus la fin, Tolosa se ganha la partida dels pretendents a la segonda plaça. Pià e Carcassona perseguisson la remontada a un classament plan sarrat e en trompa-l'uèlh. Lo paure Lion es just aquí per tornar balhar moral a sos ganhaires.

La dimenjada venenta :

- dissabte : Lion-Pià ; UTC-Limós

- dimenge : St-Gaudenç-Vilafranca ; Vilanòva-Lesinhan

- diluns : Tolosa-ASC

Sus Internet : - Lo site novèl de l'ASC XIII

Tornar a las Rubricas ?
Tornar al somari ?
Tornar a l'index ?