St-Gaudenç e Carcassona se trigòçan

Las resultas :
ASC-Limós : 28-46 ; UTC-Pià : 44-18 ; Lesinhan-Lion : 42-16 ; St-Gaudenç-Vilanòva : 22-23 ; Vilafranca-Tolosa : 14-28.

Lo classament :
1) UTC : 33 punts (11 partidas) ; 2) Tolosa : 28 punts (11) ; 3) Limós, 28 punts (11) ; 4) Pià, : 26 punts (12) ; 5) Vilanòva 25 punts (12) ; 6) Carcassona 21 punts (12) ; 7) Lesinhan : 20 punts (12) ; 8) St-Gaudenç : 19 punts (10) ; 9) Vilafranca : 17 punts (12) ; 10) Lion : 10 punts (10)

En tres passas :

- Tiratges : En Cup, las formacions occitana e catalanas reçaupràn los 2 e 3 d'abril : Tolosa-Wath Brow Hornets, UTC-Hull Kingston Rovers e Pià-Cougars Kelgley. Per aqueles 1/16en de finala, evitan formacions de Super League e pòdon pensar a anar mai luènh dins la competicion. Lo tiratge de las mièja-finalas de la Copa Lord-Derby prevei d'oposicions occitano-catalanas entre Limós e Salses d'una part e Tolosa e UTC d'autra part (pels 9 e 10 d'abril)..

- Ecumenisme : L'establiment privat St-Jò de Limós dobrís una classa rugbí ont los joves s'entrainaràn als... dos rugbís !

- Miracle dels Rampalms : Dins lo n° d'aqueste dissabte 19 de març de L'Equipe-Magazine, doas citacions literàrias del XIII !!! Mencion del libre Immortel Pipette (p. 96 ; rubrica dels libres), puèi, dins un article suls 50 libres d'espòrt que cal aver legit, la mencion en... 15ena posicion de : Ma vie sportive, David Storey, La Fosse aux ours, 2002. Un classique de la littérature sportive britannique. Transposé au cinéma par Lindsay Anderson (If). Soit le destin tourmenté de Franck Martin, mineur élevé aux nues parce qu'il excelle au rugby (à treize) et toutes les conséquences relationnelles que cette promotion induit. »
- Cinemà : qualqu'un a vist aquel film If ?

Lo comentari :
L'UTC, Tolosa e Limós perseguisson lor marcha en abans cap al grope A de las pelhòfas. Aqueste còp, Pià capita pas a s'opausar bravament a l'ògre vesin. Es que Tolosa i arribarà, lo còp que ven ? Marrida passa per St-Gaudenç : dobla eliminacion en Copa (Lord Derby e Cup) e novèla desfacha a l'ostal : l'ors es al fons de la tuta ! L'ASC es totjorn mal en punt, mas aquò es pas una novèla. Lesinhan marca punts decisius per demorar dins los uèit primièrs e poder persègre lo campionat aprèp la primièra fasa.

A venir :

- dissabte : Lion-ASC ; Vilanòva-Vilafranca ; Pià-St-Gaudenç

- dimenge : Limós-Lesinhan

- diluns : Tolosa-UTC

Sus Internet : - Lo site novèl de l'ASC XIII

La partida : Pòrtas dobèrtas a Ciutat

Fasiá una minuta que se jogava : Ferriòl traucava, la defensa locala lo gaitava córrer e far present d'un ensag tot cuèit a Planàs. E la partida èra acabada ! A cada acceleracion roja, la defensa jauna plegava coma se los 30 000 participants de la marèia umana de Toques & Clochers èra de passatge per brandir las campanas a las pauras Aglas desplumadas. Un còp o l'autre, una accion carcassonesa balhava un chicomet d'espèr als creseires de miracles, un pichon tifa-tafa lèu atudat per una novèla iniciativa o intercepcion limosenca. Lo planchòt n'acabava pas de virar : 18-12 a la pausa per s'arrestar fin finala (la finala, pas per Ciutat !) sus la marca de 46-28 (9 ensags contra 6). Aquò vira a Limós ; en contra, a Carcassona, la formacion es puslèu dins lo campval e sap pas mai ont penjar lo lum per tornar prene un camin que semblèsse a quicòm. Anem, dimenge, una pichona victòria a Lion per se balhar un pauc de moral ? Limós esperarà lo vesin de las Corbièras per una pascada consistenta !

Tornar a las Rubricas ?
Tornar al somari ?
Tornar a l'index ?