Lo Pol grafinha lo Cangoró !

Aqueste dimenge 21 de novembre, lo temps es al bèl sus Tolosa. Als Sèt-Denièrs, an escafat la linha dels 22 per la remplaçar per una linha dels 20 m. Una temperatura caudeta de 16° espèra un public que ven tornar trapar la flaira dels rescontres internacionals bèls : França-Australia de XIII es a l'aficha.

Questions : Lo XIII de França es en mesura de renovelar sa prestacion del 11 fàcia als Neo-Zelandeses ? Los Cangorós, en camin per la finala de las Tres-Nacions, a quna salsa van apreparar los Pols ?

Las equipas :
Los Blaus :
Guigue (UTC) ; Zitter (TO), Couturier (TO), Hermet (Vilanòva), Van Snick (Vilanòva) ; Max. Gressèque (Pià), Rinaldi (cap, UTC) ; Mounis (UTC) ; Fakir (UTC), Elima (Wakefield) ; Ferriol (Limós), Berthezène (UTC), Fellous (UTC) ; Pramil (ASC), Casty (FCL), Sirvent (St-Gaudenç), Carrascò (Vilanòva), Tamghart; (L'equipa de França poguèt utilizar 18 jogaires)
Los cangorós : Bowen - Tate, Berrigan, Carroll, Cooper - Loycker, Kimmerley - Kennedy - Timmmins, Fitzgibbon - O'Meley, Wing, mason - Hill, Civoniceva, Ryles, Tonga.

L'Entama blava
Un còp presentacion de las còlhas e imnes escampats, se dintra lèu-fait dins lo viu del subjècte : la partida serà fisica, caldrà téner lo còp !
Tre la segonda minuta, los Blaus dobrisson la marca sus una penalitat de Maxime Gressèque.

França : 2 - Australia : 0

Los locals fan una supèrba entama de partida, sostenguts pel public. E, a la 5ena minuta, Berthezène trapa Fellous a l'interior, lançat coma un bolet de canon. Lo pilar tomba darrèr la linha, Gressèque transfòrma e lo planchòt indica :

France : 8 - Australia : 0

Pas lo temps de memorizar la marca, que los Verds replican sul pic : corsas crosadas e ondejantas que meton lo Ryles dins un traucàs que li permet de marcar sens oposicion. Amb la transformacion, aquò fa :

França : 8 - Australia : 6

Los Blaus capitan de recuperar doas paumas sus fautas de man dels Australians e a la 16ena, bis repetita del primièr ensag mas amb aqueste còp Fakir al relais. E coma Fakir es magic, los Blaus doblan los Verds a mai Gressèque metèsse la pauma de la transformacion sul pòst.

França : 12 - Australia : 6

Lo public crida, sosten los Blaus. Los Verds perdon lo rugbí e fan una deca sul remandadís. Rinaldi distilla un pichòt còp de pè a nautor d'èrba e Gressèque quicha lo primièr sus la pauma (20ena).

França : 16 - Australia : 6

Los Australains pataquejan sul remandadís : placatge naut + contestacion, mas las èrsas oceanianas començan de prene forma e val mai pas ensajar d'i surfar dessús : una longor de tarren aquò fa pas que tres sauts per un marsupial ! L'alièr Cooper marca en canton (26ena) sus una passa al pè millimetrada.

França : 16 - Australia : 10

Los Verds acceleran, la pauma sauta de man en man e marcan pel segonda linha Fittzgibbon. Amb la transformacion, Australia torna a nautor :

França : 16 - Australia : 16

De la dificultat d'acabar la mièg-temps

Los Verds se lançan a l'ataca tre lo còp de pè de remesa en jòc, mas l'accion s'acaba sus una fauta de man a 5 m de la linha : susada !
A la 35ena, aprèp una infiltracion de Gressèque, Ferriòl va darrèr la linha mas pòt pas concretizar e, d'un còp, la partida vira ! Las 5 darrièras minutas van èsser terriblas pels Blaus. Van pagar una depensa d'energia per una pana de buf, unes jogaires macats. La pauma corrís tròp vite e los Verds marcan còp sus còp ; an pas de besonh del Woody Woodpecker d'un pargue d'atraccion catalan per traucar la defensa blava dos còps (36ena, 38ena) : 12 punts en 3 minutas !

França : 16 - Australia : 28

La corna restontís per arrestar una èrsa verda novèla.

Represa de fuòc

La pausa es profitabla als Blaus amai siaguèssen en dificultat tre la represa. Van Snick salva sus un còp de pè a seguir. L'accion rebombís sus l'autra part del tarren. Sus una candèla de Rinaldi, dos Verds patanejan e Zitter ne profita per marcar dins lo canton.

França : 20 - Australia : 28

Mas sul remandadís una marrida passa blava es mesa a profièch per Tale que marca sens oposicion sus l'intercepcion.

França : 20 - Australia : 34

Los Occitano-catalans contunhan d'escartar las paumas. Los avants refusan pas lo combat fisic : aquò peta, aquò cartona, lo caramèl e las crocandas son en tarifa promocion per paquet de tretze a la dotzena. Lo public s'escrida e torna prena lenga.
Berthezène e Fakir ensajan de tornar faire la mica-maca de la debuta. Sus un còp de pè blau, lo 3/4 centre australian escampa la pauma en balon mòrt. Los Blaus s'installan dins los 20 m australians, mas pas aisit de passar la granda muralha d'Australia. Sus ataca generala, Rinaldi en cap de linha crosa amb Zitter que marca (62ena). Lo Maxime Gressèque tasta un pòst novèl : dos maluroses punts envolats !

França : 24- Australia : 34

Quatre minutas pus tard, sus una passa a nautor dins sos 40 m, Sirvent s'escapa e pren la linha dirècta per Sydney. Amb la transformacion de Gressèque, los Blaus son tornats a 4 punts !

França : 30 - Australia : 34

Lo cangoró coneis pas la pietat ! Tant qu'i sèm, perdequé pas i creire, mas Tolosa es pas Lordas : i aurà pas de miracle.
75ena : Guigue salva coratjosament jos una candèla, ensaja de lançar Fakir. Aqueste contraròtla pas la pauma e tres passas puèi los Verds son entre las barras

França : 30 -Australia : 40

Abans la còrna finala, los Cangorós tornaràn passar dos còps la linha blanca : tròp vite, tròp fòrt per acabar sus un :

França : 30 - Australia : 52

qu'es una marca pas plan pagada per una formacion occitano-catalana qu'es anada al cap de se, qu'a pas jogat aquesta partida en victima expiatòria mas a sauput placar, defendre e tanben prene d'iniciativas. Pas utile de citar l'un o l'autre de la partida terribla dels avants, del menar del jòc dels mièges o de la solidaritat e del sosten permanent dels tres-quarts e de l'arrièr.

Res a véser amb lo pietadós 74-0 de Besièrs. Òm ne torna demandar !

Unas resultas de confortar per capitar l'objectiu d'una plaça en mièja-finala a la Copa del Monde de 2008, mas tot es possible per una formacion valenta, solidària e imaginativa.

Revista de premsa :

- Treize séduisant ! (L'Équipe)
- La France reprend des couleurs (la Dépêche du Midi)
- La France en bleu roi a fait douter l'Australie (L'Indépendant)
- Les Kangourous ont douté (Midi-Olympique)

TENGUT PER DIT :

Dialògue de tribuna de premsa :
L'Australian : - You live in Toulouse ?
L'Occitan : - No, Carcassona !
L'Australian : - Oh, yes : ASC, Pipette was the idol of my father.
Lo tipe teniá a la man lo libre de Bernat Pratviel : « Immortel Pipette » e lo fulhetava amb grand interés e emocion.

Domatge :
Los fiulets d'una part del public suls còps de pè de transforamcion dels Verds.

Gaireben : Un titol de Midi-Olypique de la setmana passada sotalinhava la « courte victoire » dels Blaus fàcia als Quiois !

TV : Sport+ a passat un acòrdi amb la FFR XIII per la difusion de sièis rescontres per la sason 23004-2005.

Finala : La finala del Tornèg de las Tres-Nacions opausarà Granda-Bretanha e Australia aqueste dissabte 27 a 11. I a pas mai de plaças a l'estadi de Leeds !

Tres setmanas : 21 jorns encara a se rosegar las urpas abans la represa del campionat (los 11 e 12 de decembre).

Tornar a las Rubricas ?
Tornar al somari ?
Tornar a l'index ?