La Copa per l'UTC o per Limós ?

Las resultas :
- mièja-finalas de la Copa : dissabte, a Carcassona : UTC-Tolosa : 26-10 ; dimenge, a St-Esteve : Limós-Salses : 86-20

- campionat : St-Gaudenç-Lion : 26-0


La partida : Sufís pas d'èsser valent !

Te fasiá un freg ivernal a Domec aqueste dissabte de nuèit : las doas formacions majas del XIII causiguèron de se rescalfar en se fretar a de defensas tonicas.

Te fasiá un freg ivernal a Domec aqueste dissabte de nuèit : Tolosa aviá benlèu mancat lo tren del costat de Matabiau e quand, enfins dintrèron dins la partida al cap de cinc minutas, los Catalans avián ja dètz punts d'avança ! Tròp tard per tirar lo senhal d'alarma !!!
E òc, aquò tardèt pas : lo 0-0 demorèt 47 segondas exactament al planchòt : còp de pè en tòca de Tolosa per l'entama, penalitat al centre per l'UTC e en tres passas : Rudder darrèr la linha ! Cinc minutas puèi, Vergès lançat per Rinaldi portava l'avança catalana a dètz punts ! Los Catalans podián veire venir. James Wyne trapèt un trauc darrèr la defensa de l'UTC montada tròp lèu per redusir la marca (10-4 a la 9ena). Los Catalans confirmavan lor superioritat a la 35ena minuta en jogant a la man un cinquen tengut sus l'ala dreita que s'acabava amb un ensag novèl marcat per l'alièr James Murphy : 16-4 a la pausa.
(Seguís, colona de dreita)

(Seguida)
Tolosa aviá l'avantage del vent (de la ventòrla, caldriá dire) per la segonda part. Coturièr mandava la pauma entre las barras sus penalitat (16-6, 46ena). De mièja-ora, la còlha dels Minimes s'installava dins los 20 mètres catalans. Prenguèron lo temps per vistalhar d'a fons las muralhas del Castilhet : s'avisèron qu'èran plan solidas. E coma l'inspiracion dels blaus e blancs a perdut totas las subtilitats que podiá aver un cant de trobador o l'estrategia dels comtes Raimons, al cap del cap de combinasons estereotipadas e repetidas sens succès, de jòc a plat, de dos passatges en tòca dels alièrs al moment de cabuçar dins l'en-but, fàcia a e una defensa catalana tala un pofre als braces multiples,... la recòlta foguèt mai que magrinèla : zerò punt de marcat !
A un moment, los Catalans decidiguèron qu'èra ora d'anar veire lo temps que fasiá dins los vint mètres occitans. Sus l'avançada, Cologni s'arrestèt pas e ne profitèt per anar marcar (22-6, 67ena). Saddaoui trapava un trauc e s'arrancava sus quatre-vint mètres ; èra ratrapat de justèssa, mas un tengut mai luènh, Hall portava la marca catalana a 26 punts (72ena).

L'UTC podiá dessarrar son estrencha e daissar Janzac clavar la partida sus un ensag (75ena) que los empachariá pas de tornar trapar Limós a Domèc lo 21 de mai per la finala.

Lo comentari :
Logica respectada per las mièja-finalas de la Copa : l'UTC mestreja la partida e torna batre los Tolosencs segon un scenariò semblable al debanament del rescontre de campionat de la quinzenada passada. Limós fa pas coma Lion e Vilanòva e exprimís la diferéncia de categoria ambe Salses : 86 a 20, 16 ensags contra 5 !
En campionat, St-Gaudenç contunha sa remontada per venir prene part a las discutidas per lo primièr grop de las pelhòfas. Lesinhan, que se poirà pas qualificar en rason del règlament, a trapat los mejans d'acabar la sason. Aurem doncas, enfins !, una jornada complèta de campionat la dimenjada dels 16, 17 e 18 d'abril !

La dimenjada venenta :

- dissabte : Vilafranca-UTC (20h)
- dimenge : Pià-ASC (15h), Limós-Lion (15h), Lesinhan-St-Gaudenç (15h)
- diluns : Tolosa-Vilanòva (20 h)

Sus Internet : - Lo site novèl de l'ASC XIII

En tres passas :
- La suspresa : En juniòr, l'equipa d'Avinhon jogarà la finala aprèp sa victòria fàcia a.. l'UTC : 22-16. Una equipa amb d'èime, de solidaritat e de valentisa a desjogat los pronostics. Al còp de fiulet de la fin, los jogaires catalans s'emportèron lo recòrd mondial de retorn als vestiaris la mina pietadosa del temps que del costat del pont trencat se sautava de jòia, se corrissiá dins totes los sens, se saludava lo public, se potonejavan coma s'avián ganhada... la finala. Mas benlèu que Limós, ganhaire aisit de Vilanòva, serà pas d'acòrdi !
- Super League : Las partidas de Super League se pòdon seguir sus grand escran a l'Ostalon de Limós 13, a l'Agulha. Aqueste divendres 15 : un Wigan-Leeds de darrèr las bofanèlas (nòta de la clavaira : a saupre se los angleses sabon çò qu'es una bofanèla !!!) es anonciat !
- Universitat : Rescontrat al Salon del torisme de Limós, lo Loló Bonnery, president de la Liga Lengadòc-Rosselhon, confirmèt que son idèia d'una Universitat d'Estiu del XIII li èra pas sortida de pel cap e que preparava un tal rendètz-vos associatiu, istoric e cultural per l'estiu de 2006 amb un acamp de prefiguracion a la fin de l'estiu d'ongan. De seguir...

Tornar a las Rubricas ?
Tornar al somari ?
Tornar a l'index ?