Passejadas de prima

Las resultas :
dimècres : Lion-UTC : 6-46
dissabte : UTC-Lion : 86-6 ; ASC-Lesinhan : 50-0
dimenge : Limós-Vilafranca : 56-4 ; St-Gaudenç-Tolosa : 8-36 ; Vilanòva-Pià : 24-61

Lo classament :
1) UTC : 45 punts (15 partidas) ; 2) Limós, 36 punts (15) ; 3) Tolosa : 35 punts (14) ; 4) Pià, : 33 punts (15) ; 5) St-Gaudenç : 32 punts (15) ; 6) Vilanòva 30 punts (15) ; 7) Carcassona 29 punts (16) ; 8) Lesinhan, Vilafranca : 20 punts (15) ; 10) Lion : 15 punts (15)

Lo comentari :
Tornarmai una dimenjada de partidas desequilibradas, amai se Vilanòva resistèt una orada a Pià. Las darrièras jornadas seràn decisivas per saupre qualas seràn las doas formacions (entre Limós, Pià e St-Gaudenç) qu'acompanharàn l'UTC e Tolosa dins la pola bèla de las pelhòfas.

La Partida : Coratge, Lesinhan !
Serada tristoneta jos la pluèja d'una serada d'abril a Domèc. D'un costat, una formacion jauna e negra que n'arrèsta pas son operacion « Pòrtas dobèrtas » de partida en partida. De l'autre, Lesinhan a las escanas qu'a mes los estrangièrs dins l'avion de retorn e qu'a vist desaparéisser los jogaires catalans. Pas que sètze jogaires sus la fuèlha de match e encara dos juniòrs qu'avián ja jogat quaranta minutas amb sos partenaris.
Alara, se Carcassona prenguèt lèu-fait l'avantatge per tres ensages (16-0) abans un quart d'ora de jòc, los Verds e Blancs ramosèron las fòrças per resistir abans de tornar plegar dos còps abans lo còp de fiulet de la pausa : 28-0.
A la represa, un novèl ensag local : 34-0, puèi de longas minutas de dominacion lesinhanesa estèrla e d'aproximacions carcassonesas. De qué badalhar dins las tribunas ! Qauquas acceleracions a la fin per clavar sus un 50-0 que demorarà pas dins l'istòria.
Un sol crit : Coratge, Lesinhan ! Tenètz còp ! Lo monde tretzista a besonh de la còla de Corbièras !
E a l'ASC d'ensajar de ganhar atal dins una quinzenada contra d'autres Verds e blancs, a Vilanòva, se que non la segonda fasa se poiriá jogar sonque per l'onor d'un biais tristonet e dins l'espera cavilhada al còr dels endemans que cantan.

La dimenjada venenta :

Disabte, se perseguís la mesa a jorn del calendièr amb los rescontres :

Tolosa-St-Gaudenç, Pià-Limós, Vilafranca-Lesinhan, UTC-Vilanòva.

Sus Internet : - Lo site novèl de l'ASC XIII

En tres passas :
- Internacional : Australia se ganhèt lo primièr rescontre de l'an contra Novèla-Zelanda : 32-16 del costat de Brisbana.
- Signaturas : lo jove Casty de Lesinhan ven de signar per 3 ans a l'UTC qu'anóncia tanben la venguda del mièg de mesclanha dels Quioís Stacey Jones e d'un avant e d'un tres-quart australians per renfortir la formacion catalana en vista de la Super League.
- Clucar : cada ensag de Carcassona, foguèt saludat aqueste dissabte pel clucatejadís dels fares de las veituras de la marca qu'esponsorizava la partida. A nòu ensages la serada, es de notar que las batariás tenguèron lo còp : un lion aquò es fòrt !

Tornar a las Rubricas ?
Tornar al somari ?
Tornar a l'index ?