La Copa s'arregala a Perpinhan !

Lo comentari :
Dètz milierats d'espectators aqueste dissabte 21 de mai dins las tribunas de Domèc per seguir la finala de Copa entre l'UTC e Limós, 65 ena edicion de la Copa Lord Derby. E una question d'intrada : cossí los Roges e Negres van resistir a l'Ògre catalan ?
La victòria es per Limós, mas aquò es per la finala dels juniòrs que ganhan contra Avinhon (38-24).
La victòria es per Limós, mas aquò es pel nombre e lo rambalh dels sostens !
E sul tarrenc ? L'èrba es verda, la temperatura fresca just çò que cal, lo marin jòga a l'aissable. Dins las tribunas de la premsa, de monde bèl : Sport+, BBC, França-3 (per un còp) e tanben : Radio-Marseillette, 100%-Radio e Ràdio Lenga d'Òc.

19h30 : En Alibèrt pòt fiular l'entama del primièr grand rendètz-vos d'aquela fin de sason. E aquò serà de seriós : las defensas se meton sul pic al trabalh per empachar las atacas al sortir de l'uòu. Al cap d'un quart d'ora, l'alièr catalan serà arrestat a 20 cm de la linha. Lo primièr punt serà per Limós amb un tombat de Murcia. Rinaldi tusta en diagonala, Murphy sauta entre l'alièr e lo darrièr e marca : 4-0 per l'UTC. Monís trauca, Rinaldi es a nautor per far l'ofèrta d'una pauma d'ensag al Fraissinós qu'ajusta los dos punts de la transformacion : 10-1. Marca mal per Limós ? Non, Mc Kay trapa un trauc de mirga al ras del tengut e cabussa a tocar los potèus : 10-7. Una fauta sul tengut empacha Limós de prendre l'avantatge. Los Audencs daissan fugir dos punts d'una penalitat plan plaçada per passar puèi un tombat per Jovani. Dintran al vestiari amb un retard leugièr : 10-8.

La represa se va parar de roge e negre amb una ataca que davala coma un caval fòl tot lo tarrenc e Nelson que marca sens esperar lo replegament de la defensa catalana. Limós es dabans : 12-10 ! Las còrnas restontisson !
Mas aquò durarà pas e en tres minutas, quatre moviments e doas acceleracions, l'UTC plegarà la partida. Una escapada de Fakir que profita a Vergès e una passa dins lo trauc de Rinaldi a Cologni daissan sens reaccion los Audencs. Amb las doas transformacions, aquò balha un avantatge bèl als sang e aur : 22-12.
Limós es valent mas cansat e trapa pas solucions ofensivas. La bona volontat se complica de fautas de man. Monís jòga a la perinqueta dins la defensa roja e tomba darrèr la linha : 28-10. La sardana pòt restontir. Un tombat de Rinaldi e una penalitat de Fraissinós conflaràn la marca.

La Copa tornarà partir per Perpinhan d'ont èra arribada lo matin.
La pauma correguèt long de las 80 minutas d'una partida corrècta e enlevada, amai se lo debanament e la conclusion foguèron sens suspresa maugrat la brava resisténcia de Limós mas ongan la maquina catalana es tròp fòrta.

L'an passat, en finala del campionat, St-Gaudenç aviá trapat lo bon gran de sabla per faire espetar la maquina, mas ongan ?

Al fons de la Copa

- L'òme de la partida : Los ancians internacionals de 51 (l'annada, pas lo pastagàs !) e de 55 designèron lo mesclanha catalan Rinaldi coma òme de la partida.
- Problèma genetic : Se sap que l'escais de l'equipa de Limós es lo Grizzlí. Mas, per perseguir carnaval, un Limosenc corrissiá sul tarrenc vestit en ors... brun !
- Paures estaticians : Las doas equipas probèron, un còp de mai, qu'a XIII es inutil de comptar los temps de jòc : totas las minutas son temps de jòc !
- Vilatjòt : La federacion aviá mes sus plaça un « Vilatge » a l'intrada de l'estadi amb carri-podium, de vin, tendas... Un ensag que demanda d'èsser melhorat.
- Joinessa : Un milierat d'enfants al Tornèg Ostric e 200 per una iniciacion : l'avenir del XIII s'aprepara.
- Pas seriós : l'equipa juniòr de Tolosa que se presenta a 9 per disputar la partida contra l'ASC. Dire que Tolosa es tornarmai candidata a la Super League !
- Calendièr : Novembre o genièr, quora començarà lo campionat venent ? Las equipas se botèron pas d'acòrdi a l'acamp que se tenguèt abans la finala !

De jogar : Tres partidas encara aqueste dissabte 28/5 per clavar la primièra fasa : Lesinhan-Pià (18h), Lion-Tolosa (15h30) e lo revenge de la finala de la Copa : Limós-UTC (18h)
Sus Internet : - Lo site novèl de l'ASC XIII

En campionat :
Tolosa, logicament : Mens de monde aqueste diluns de ser dins las tribunas de Domèc per una novèla desfacha anonciada de l'ASC. L'equipa, valent a dire los jogaires ramosats per aquela formalitat, tenguèt còp 40 minutas (16-14 a la pausa pels mondins) abans d'èsser despassada pel ritme dels visitors : 36-18 a la fin.

Tornar a las Rubricas ?
Tornar al somari ?
Tornar a l'index ?