Tot es pas jogat !!!

Las resultas :
- Pola A : Tolosa-UTC : 10-12 ; Limós-Pià : 22-20

- Pola B : ASC-St-Gaudenç : 32-24 ; Vilafranca-Vilanòva :

Los classaments :
- Pola A : 1) UTC : 65 punts (21 partidas) ; 2) Tolosa : 51 punts (21) ; 3) Limós, 45 punts (21) ; 4) Pià : 44 punts (21)

- Pola B : 1) Vilanòva 49 punts (21) ; 2) St-Gaudenç, 40 punts (21) ; 3) Carcassona 39 punts (21) ; 8) Vilafranca : 27 punts (21)

Limós-Pià :

A l'Agulha, aqueste dissabte, fasiá un temps a demorar a l'ombra e a se beure un aperitiu plan frèsc. Mas non : caliá jogar aquela partida de las pelhòfas. Limós prenguèt l'avantatge, ajudat pels arbitres que vegèron pas un en-abans gròs coma un torn de fecas ! Pià joguèt vendémias en verd : un jogaire doblidèt d'aplatir, d'autres manquèron un tres contra un ! 16-8 per Limós a la pausa.
A la represa, Mayans, sus una brava mala, pensèt de metre los Carnavalièrs fòra de portada. Los esperits s'escalfèron (!!!) un briconet : quatre cartons jaunes. Las lèbres catalanas marquèron dos ensages sus la fin, mas tròp tard : Limós torna prene la tresena plaça. Retorn : dissabte que ven ! La calor va montar d'un gra en tèrra catalana !

En tres passas :

- Quna calor ! : una constatacion dels espectators e dels jogaires. A voler seguir l'emisfère sud, se ne doblida qu'aval jògan pas l'estiu mas l'ivèrn qu'es a s'entamenar !

Lo comentari :

Pauc se'n manquèt que Tolosa ganhèsse contra l'UTC a la fin d'una partida disputada. Limós e Pià contunhan una batèsta sarrada per la tresena plaça. En pola B, l'ASC ganha lo dreit d'esperar encara una qualificacion miraclosa.

Las partidas :

ASC-St-Gaudenç : Enfins !

E òc, enfins ! Pel primièr còp de l'an, se vegèt l'ASC jogar coma cal : encadenar los movements, faire pròba de ritme e se mostrar solidaris en defensa. L'entrainaire-dobertura Simon Dorrel joguèt juste tota la partida, lo Patrici Benausse se mostrèt atalentat per la linha d'ensag (tres ensags marcats) e Molí, aprèp, una tropelada de nafraduras, torna enfins a son melhor nivèl : realizèt una mala d'antologia sus mesclanha que daissèt Arnaud Dulac sus plaça.
Çaquelà, la primièra mitat èra estada a l'imatge de la sason : una dominacion de contunh mal pagada contra una sola incursion dels Orses que s'acabèt sus un ensag de Sirvent. Çaquela, Carcassona menava 10-6.
Mas a la represa, los Blaus e blancs se metèron a tombar las paumas e Carcassona cavèt lo trauc : 28-6, 30-12. En uèit minutas, los campions tornèron per dos novèls ensags : 30-24. Marca-mal se passejava d'autant mai que Pramil se vesiá ofrir un carton de roge per aver tròp levat lo coide. Mas Dorrel ajustava una penalitat definitiva que permetiá als jaunes e negres d'esperar lo còp de fiulet de la desliurança e de sortir jols picars de las mans del public fisèl.

La dimenjada :

- Cup : Tolosa-Widness (dimenge 26, a 15h)

- Campionat :

-. pola A : Pià-Limós (dissabte 25, a 20 h) ; UTC-Tolosa (dimècres 29,a St-Estève)

- pola B : Carcassona-Vilafranca (divendres 24, 20 h) ; St-Gaudenç-Vilanòva

Sus Internet : - Lo site novèl de l'ASC XIII

Tornar a las Rubricas ?
Tornar al somari ?
Tornar a l'index ?