Lo mèstre e lo dalfin

Las resultas : Las mièja-finalas :

- Campionat : Dissabte 23 a Carcassona : Tolosa-Limós : 46-18 ; UTC-Pià : 22-6.

- Cup : (dissabte 30) Hull-ST-Helens : 32-8 ; (dimenge 31) Leeds-Tolosa; 56-18

En tres passas :

- A 12 : Provença torna dins la competicion amb las inscripcions de Marselha e Carpentràs dins lo campionat d'Elita de 2005/06 que començarà cap al 5 de novembre e s'acabarà la primièra dimenjada de julhet.
- Tresena : Los Blaus universitaris se ganhèron la tresena plaça de la Copa del monde contra los angleses. En finala, los neo-zelandeses l'emportèron fàcia a Australia.
- Retorn : Jiròni Guisset ven de signar a l'UTC per la sason venenta.
- President : Es lo capitani Pascal Caimant que remplaça lo Francís Camèl a la direccion de l'ASC XIII.
- Internet : Aqueste mes d'agost vei a l'encòp la relança de Rugbytreize.com e la naissença de www.eliterugby.com
- D'escotar : Se podètz pas èsser a Narbona, podètz escotar la retrasmission en lenga nòstra de la finala sus www.radiolengadoc.com amb lo parelh Alan-Franceson (bonas vacanças al Patona !).
- De veire : La Finala sus Sport+ en dirècte o dimenge 7 a 14h15 e diluns 8 a 8h30.

Los comentaris :

Una finala logica

Lo 6 d'agost, sul còp de 7 e mièja, se traparàn sus la pelena de l'Egassieral los catalans de l'UTC e los occitans de Tolosa Olimpica.
Una finala logica qu'opausarà lo primièr e lo segond de la fasa de classament.

Limós tenguèt una mièja-oreta, mas lo jòc viu, amb un sosten permanent de la còlha mondina e un mesclanha (Wyne) inagantable despassèt lèu-lèu la formacion roja e negra.
Partida mai seriosa entre las formacions catalanas : l'UTC sens engèni s'acontentèt de quauquas acceleracions per faire la diferéncia fàcia als Pianecs qu'opausèron tota la volontat que lor i demorava.
La logica fa de l'UTC la favorita de la finala, mas Tolosa li pòt pausar de braves problèmas. Ara, de saupre cossí los Occitans se remetràn de la mièja-finala de la Cup contra Leeds ?

Valenta equipa de Tolosa

Los Occitans joguèron una brava mièja-finala de Cup o, per lo mens, una primièra part de fuòc. Marquèron los primièrs e arribèron a la pausa sus un retard pichonèl de quatre punts : 22-18 aprèp una escapada de tria del capitani Raguin (òme de la partida). E encara, Almuzarà doblidèt un companh a dreita e un a esquèrra per anar s'emplastrar sul darrèr desfensor a la tota darrièra segonda.
Aprèp la pausa, la maquina anglesa se metèt en plaça : lo mendre trauquilhon en defensa se trasformèt en ensag. Brava e dura leiçon de realisme. Tant que i èran, Leeds butèt la darrièra mesclanha per recuperar una bala d'ensag !

A venir :

- dissabte 6/8 (Narbona, Egassieral, 19h30) : finala del campionat entre l'UTC e lo Tolosa Olimpic.

 

Sus Internet : - Lo site novèl de l'ASC XIII

Tornar a las Rubricas ?
Tornar al somari ?
Tornar a l'index ?