2nda jornada : Quand Limós jòga a l'orsalhèr...

Las resultas :
ASC-UTC : 8-34 ; Lesinhan-Tolosa : 24-46 ; Vilanòva-Lion : 22-2 ; St-Gaudenç-Limós : 22-26 ; Pià-Vilafranca : 46-6.

Lo classament :
1) UTC, Tolosa, Limós : 6 punts ; 4) St-Gaudenç, Vilanòva, Pià, Vilafranca : 4 punts ; 8) Carcassona, Lion, Lesinhan : 2 punts.

En tres passas :

- Afrontaments : Pels 1/8en de finala de Copa, pels 8 e 9 de janvièr, a l'aficha dos afrontaments entre formacions de l'Elita : ASC-St-Gaudenç e UTC-Pià. Aquò promet...
- Los uèlhs doces : D'unis dirigents del XV pel Djamel Fakir... Per lo faire jogar el tanben en resèrva ?
- La finala : Es a Perpinhan qu'es previst lo debanament de la finala del Campionat d'Elita lo 6 o lo 7 d'agost de 2005.

La partida : La muralha catalana

Carcassona aviá de se faire perdonar la desfacha a Vilafranca. A la sortida, es la decepcion pel public audenc. Una impression amarga de veire la formacion jauna e negra capitar pas a se metre a la nautor de la formacion catalana. En 8 minutas fatalas (de la 25ena a la 33ena), Carcassona encaissèt tres ensages.

Una cordelada d'errors individualas e de paumas perdudas pagadas sul pic per d'ensages catalans faguèron plegar una bona volontat braveta e las promesas mostradas pels novèls venguts, en particulièr lo talonaire Pat Gibson. Lo realisme catalan es pas de poësia, mas de punts a la marca !

A la sortida, son sèt ensages (tres pel centre-caçaire de linha blanca Bailey) marcats per la formacion sang e aur (e tres trasformacions) contra un solet ensag de Gibson (mai la transformacion e una penalitat del capitani Banquet) dels locals qu'ornèron lo planchòt de Domèc dins una alternància de solelh ivernenc e de pluèja fina.
Aprèp doas jornadas, Carcassona se trapa en coga de classament : es ja ora de se sarrar los coides d'autant mai que s'anóncia ja lo desplaçament a Limós contra de vesins que, de matin, se creson campions del monde aprèp lor victòria a St-Gaudenç... Mas, coma disiá l'autre, cal pas vendre la pèl de l'òrs o la pluma del canarí abans de... D'aquel temps, l'UTC anirà véser lo vesin pianenc. Bon Nadal !

Lo comentari :

La suspresa de la jornada ven del pè de Pirenèus que vei l'equipa roja e negra prene lo pas sus la formacion campiona de França dins las 5 darrièras minutas. L'ASC pòt pas res contra la poténcia catalana. Lesinhan, aprèp una orada de jòc egal, plega fàcia a la prometeira equipa tolzana. Resultas logicas del costat de Vilanòva e Pià.

La dimenjada venenta :

Tolosa-Vilafranca ; Limós-ASC ; Vilanòva-St-Gaudenç ; Lion-Lesinhan ; Pià-UTC.

Sus Internet :

- Lo site novèl de l'ASC XIII

Tornar a las Rubricas ?
Tornar al somari ?
Tornar a l'index ?