4ena jornada : L'UTC pren l'endavant !

Las resultas :
UTC-Tolosa 34-10 ; Lesinhan-Limós : 23-22 ; ASC-Lion : 58-6 ; Vilafranca-Vilanòva : 12-12 ; St-Gaudenç-Pià : 18-12

Lo classament :
1) UTC : 12 punts ; 2) Tolosa, Limós : 10 punts ; 4) Vilanòva, 9 punts 5) St-Gaudenç, Lesinhan : 8 punts ; 7) Vilafranca : 7 punts ; 8) Carcassona, Pià : 6 punts ; 10) Lion : 3 punts.

En tres passas :
- Abans-tast : lo dimècres 19 de genièr, l'UTC jogarà una partida amicala contra los London Broncos (19h, a St-Estève). Los London Broncos disputaràn en julhet una partida de Super-League a Perpinhan.
- A la una : article sus l'ASCaracssona dins lo n° actualament en venda de Sportmag Languedoc-Roussillon.

- Solidaritat : La Federacion versarà la part que li reven de las recèptas dels 1/8en de la Copa per la Solidaritat amb Asia.

La partida : Lo Lion manca d'urpas

« ASC-Lion : la sason comença uèi ! » çò disián los dirigents carcassoneses.
« Seriá ora ! » se pensavan los afogats.

E aquò comencèt mal : una intercepcion de Rodriguez fasiá dobrir la marca als Rodanencs (6-0, tre la 7ena minuta). Mas per Gibson (9ena), Chaboud dins un trauc de mirga al ras del tengut (13ena) e Banquet dins l'esquina de la defensa (18ena), l'ASC preniá l'avantatge : 14-6. Lion dominava las darrièras minutas mas Albert marcava sus un contre just abans la pausa : 20-6.

Dins la segonda mièg-temps, Lion anava pèrdre pichon a pichon pè e los Jaunes e Negres repetar quauquas combinasons interessantas : Chaboud (designat jogaire de la partida) marquèt dos ensags de mai, Constans dos, Bouisset, Beatie e Folch anèron tanben darrèr la linha. Banquet transformava (6 en tot), mai una transformacion de Gibson per clavar la marca : 58-6.

D'esperar qu'aquesta victòria contra l'equipa la mai flaca del Campionat pòsque balhar d'idèias e de vam a la formacion carcassonesa. Confirmacion esperada tre dissabte pel 1/8en de Copa contra St-Gaudenç.

Lo comentari : Cada punt es d'aur !

Dins aqueste campionat 2005, cada punt valdrà d'aur ! Se l'UTC pren logicament la primièra plaça e se Lion va tornarmai patir, tot demòra dobèrt entre las 8 autras formacions.
Tolosa, presentat coma cap de fila de l'oposicion als Catalans, a degut plegar e encaissar sèt ensags, sus la pelena de St-Estève. Carcassona rempòrta pro ben aisidament la partida dels darrièrs e... se ganha pas qu'una plaçòta al classament !

Pià e St-Gaudenç disputan una partida sarrada mas los Orses tornan trobar lo gost de la victòria. Vilanòva daissa escapar la victòria sus un ensag roèrgat a doas minutas de la fin e se dèu acontentar de la paritat.

La partida pus bèla se joguèt al Molin. Se sap qu'un Singlar pòt pas suportar de se faire batre per un Limosenc e un tombat de darrièra minuta de Munoz balhèt la victòria als Verds e Blancs.

Aquò promet per la seguida.

La dimenjada venenta :

1/8en de finala de la Copa de França

- dissabte 8 : Salses-Lion (14h30), ASC-St-Gaudenç (20 h)

- dimenge 9, a 15h : UTC-Pià ; Albi-Lesinhan ; Palau-Vilanòva ; santa-Liurada-Limós ; Carpentràs-Vilafranca ; Aspet-Tolosa.

Sus Internet :

- Lo site novèl de l'ASC XIII

Tornar a las Rubricas ?
Tornar al somari ?
Tornar a l'index ?