Cinquena jornada : Un sacat de punts

Las resultas :
ASC-St-Gaudenç : 22-22 ; Limós-Pià : 51-14 ; Lesinhan-Vilafranca : 37-16 ; Tolosa-Lion : 72-14 ; Vilanòva-UTC : 4-52.

Lo classament :
1) UTC : 15 punts ; 2) Limós : 13 punts ; 3) Tolosa : 12 punts ; 4) Lesinhan : 11 punts ; 5) St-Gaudenç, Vilanòva : 10 punts 7) Carcassona, Vilafranca : 8 punts ; 9) Pià : 7 punts ; 10) Lion : 5 punts.

En tres passas :
- Un punt de mens : Per Tolosa, que son equipa juniòr se presentèt pas a Perpinhan lo 2 de janvièr. Pas seriós !

- Repeticion : Rescontre entre los London Broncos e l'UTC aqueste dimècres 19, a 19h, a l'estadi de St-Estève.

- A la tele : anonciat un reportatge suls London Broncos e l'UTC dins lo Stade 2 de dimenge que ven. D'esperar que claven lo Salviac dins un placard per l'empachar de dire una bestiesa - de dobrir la boca (çò que reven a la meteissa causa).

- Estabosits : al jornal televisat d'aqueste dimenge, lo jornalista de F3-Montpelhièr anoncièt e comentèt la desfacha de l'UTC a Vilanòva ! Caldrà aprendre dins qun sens legir las marcas !

- Proposicion : L'Equipe-Magazine del 8/1 proposava l'espelida d'un sol rugbí : jogat amb 13 jogaires mas amb las règlas del XV !!! Mas se poiriá esperar abans aquel conte de sciéncia-ficcion que L'Equipe se dotèsse d'una vertadièra rubrica dels XIII e pas solament de quauques magrinèls resultats de legir a la lópia !

- A la ràdio : Sud-Radiò fa lo punt sul XIII lo dimars en serada (entre 20h e 21h). E de pas mancar, l'emission del dissabte de matin sus Ràdio-Marselheta !

La partida : I arribarem !

Carcassona voliá faire apèl de sa desfacha en Copa, mas al cap de cinc minutas Sirvent traucava la defensa locala. Al canton, Benausse replicava a la 12ena minuta. L'arbitre daissava passar un en-abans gròs coma un ostal dels blaus e blancs e St-Gaudenç preniá l'avantatge (10-4 a la 17ena). Banquet ajustava una penalitat e sus un pichon còp de pè a ras de tèrra permetiá a Benausse de marcar, i anava de la transformacion : Carcassona menava 12-10 a la pausa.

Tre la represa, Bussian marcava, Edwards replicava pels jaunes que prenián l'avantatge mercés a Trudgett. Carcassona dominava, mas St-Gaudenç davalava tot lo tarrenc per tornar a nautor dels Canarís. Dins las totas darrièras minutas, Banquet, puèi Benausse, mancavan los tombats qu'aurián permés la victòria d'una equipa mai inspirada e mai agressiva mas que daissèt quauquas bravas ocasions de concretizar en camin.

Lo comentari : Desequilibri

Se lo rescontre entre Carcassona e los campions de França s'acabèt sus una egalitat, las 4 autras partidas foguèron pro ben desequilibradas. Lion perseguís son calvari e l'UTC sa marcha en abans. Pià es emportat per las atacas limosencas e Lesinhan s'envòla aprèp la pausa. La saca de punts e d'ensags refofa !

La dimenjada venenta :

- dissabte : Lion-Limós
- dimenge : ASC-Pià ; UTC-Vilafranca ; St-Gaudenç-Lesinhan ; Vilanòva-Tolosa

Sus Internet :

- Lo site novèl de l'ASC XIII

Tornar a las Rubricas ?
Tornar al somari ?
Tornar a l'index ?