Lo temps de las deruscadas

Lo temps de las deruscadas

- Las resultas :
Cinquena jornada (dimenjada 4/5de novembre) : ASC &endash; Lesinhan : 24-12 ; Vilafranca-Vilanòva : 10-24 ; Tolosa- Carpentràs : 48-18 ; St-Gaudenç-Pià : 2-26 ; Limós-UTC : 21-24
Jogava pas : Lion

Seisena jornada (dimenjada 11/12/13 de novembre) : Limós-ASC : 14-08 ; UTC &endash; St-Gaudenç : 12-32 ; Lesinhan-Lion : 76-4 ; Pià-Tolosa : 20-42; Vilafranca-Carpentràs : 50-16
Joga va pas : Vilanòva

Setena jornada (dimenjada 18/19 de novembre) : ASC-St-Gaudenç : 60-18 ; Lion-Limós : 18-40 ; UTC-Tolosa : 28-35 ; Lesinhan-Vilanòva : 43-26 ; Carpentràs-Pià : 24-40
Jogava pas : Vilafranca

- Lo classament :
1) Tolosa, 18 (7 partidas) ; 2) ASC (6), Lesinhan (7), Limós (7), St-Gaudenç (7), 15 ; 6) UTC (6), Pià (6), 14 ; 8) Vilafranca, 12 (6) ; 9) Vilanòva, 10 (6) ; 10) Carpentràs (6), Lion (6), 6.

- Lo comentari :
Levat Lion e Carpentràs en rèira-garda, lo campionat es plan dubèrt e sarrat amb de resultas unes còps susprenentas e la necessitat de jogar totas las partidas a fons per demorar en corsa.

L'ASC : Alba de novembre

- L'ASC regalèt son public la primièra part del rescontre contra Lesinhan, marquèt lo pas a la represa abans de ganhar sus la fin.

- Decepcion pel 11 de novembre a Limós. Aprèp una entama de fuòc coronada per un ensag de Pau, los jaunes se metèron a quauquejar lo rugbí, a copar las cadenas de tenguts, a mancar lo gèste qu'auriá menat a unes ensages meritats. Limós capitèt de dintrar a egalitat a la pausa (6-6). L'ASC reprenguèt l'avantage un momenton (8-6) abans d'encaissar un segond ensag, un segond còp aprèp lo cinquen tengut e de daissar un còp de mai lo carton de blanqueta als Blanquetièrs !

- Trionfe : la desfacha cò dels vesins menèt a una setmana de dobte pels afogats e de remesa en causa per l'equipa. Carcassona dominèt la primièra part mas se faguèt contrar sus accions individualas. Se vesiá l'enveja e la solidaritat de la còlha qu'en fins de partida espantèt de paures Orses entutats : onze ensags marcats, 60-18 al planchòt final. Lo canari èra tornarmai agla ! Lo public dreit podiá saludar sos eròis en retorn d'afeccion e de vam ! Los sòmis los pus fòls tornavan pels caps, mas la realitat tanben : un viatge pas aisit-aisit a Tolosa pel diluns 27. Cal pas vendre la pèl de la violeta sul fieral de santa-Catarina...

Copa Euro-Pacific :

De qué dire de la deruscada presa pel XIII de França a Castras : 48-10. Despassat en ritme e enveja per la formacion tonguiana. De paures Dragons que tiravan una lenga de sèt pams, lo Fakir nafrat, la pana d'imaginacion, la flaquesa del jòc al pè e las decas de man : un vertadièr jorn a pas s'anar passejar sus una pelena de rugbí. Amb un gost amar, demòra un fum de questions de se pausar per plan figurar a la Copa del Monde de la tardor de 2008 en Australia.
En finala, los Tonguians opausèron una brava resisténcia a l'Anglatèrra qu'acabèt per ganhar (32-12).

Dins lo Tri-Nations, coma l'an passat son las doas formacions dels antipòdis, Australia e Novèla-Zelanda que jogaràn la finala aqueste dissbate 25 de novembre a Sydney.

 En tres passas :
- Color piqueta : a sortir un malhòt rausa de vin, lo FCL ramassèt doas piquetas, a domicili fàcia a l'UTC e a Domèc contra l'ASC. Dins lo debacte entre Verds e Blancs, joguèron amb un malhòt blanc e ganhèron !

- Lo carri : la victòria contra St-Gaudenç reviscòla lo club dels afogats dels jaunes e negres qu'organizan un carri per Tolosa (despart : diluns, 18h15 de la Plaça d'armas). Se marcar al sèti.

- Lo sèti : Sèti novèl per l'ASC al 5 de la carrièra Buffon.

- Estadi : per la sason 2007, los Dragons tornaràn trapar Gilbèrt-Brutús remés a nòu. Atal, auràn pas mai de demandar l'autorizacion de jogar a l'USAP !

- E qun mestièr ! : aquel d'entrainaire de l'UTC amb una còlha que jòga un còp amb Dragons, l'autre còp sens, amb de juniòrs o pas, los qu'an enveja devenir Dragons e los que n'an pas lo nivèl... Una equipa que va ganhar a Limós e Lesinhan mas que pèrd dos còps en seguida a l'ostal contra St-Gaudenç e Tolosa.

- La setmana catalana : per Tolosa que ganha lo diluns a Pià e lo dissabte a Perpinhan !

- L'afrontament : En Copa de França, suspresa a l'Agulha amb la victòria de Piussan sus la formacion de Cabardés per clavar una dimenjada que vegèt los juniòrs de Limós ganhar elis tanben contra los correspondents de Carcassona ! Cal pas que vengue una costuma !

- Un present per Nadal : s'avètz un amic ( ? ? ?) quinzista, per renfortir aquela amistat, vos cal pas mancar de li faire present per Nadal del libre :
" Le rugby interdit " de Myke Relance.

- Tot negre : e vòstre amic arriba pas a encapar qu'un pilièr pòt faire un cadratge-debòrdament e es estabosit de veire un balon córrer, córrer, córrer...
Black is all black !

- Espantats : los espectators quinzistas de Colomièrs e Castras dels rescontres del XIII de França : " E perqué torna pas remandar al pè ? E ensajan pas d'ensacar la penalitat ? Mas s'arrestan pas jamai...". Privats de " temps de jòc ", ne perdèron lo buf assetats dins las tribunas !

- Trabalh : L'Associacion de devolopament de Tuchan es en cèrca d'un estagiari (estudiant en sociologia, MST Patrimòni o STAPS) per menar una enquista per un projècte cultural sus la memòria e la vida del rugbí en Corbièras nautas. Contact : Magali Blanc, 04 68 45 44 09

- Internet :

lo site dels afogats : http://canari-club.forumactif.com/
lo site oficial dels jaunes :
http://asc13.nuxit.net/

- la dimenjada :
Uèitena jornada (dimenjada 25/26 de novembre)

Tolosa-ASC (diluns 27, a 20h) ; Vilanòva-Limós ; St-Gaudenç-Lion ; Pià-Vilafranca ; Carpentràs-UTC

Jòga pas : Lesinhan


Tornar a las Rubricas ?
Tornar al somari ?
Tornar a l'index ?